Өв соёл, уламжлал, ёс заншлаа эрхэмлэн дээдэлж, үеэс үед өвлүүлэн түгээж, хөгжин дэвжиж буй казах түмний Нарны баяр буюу Наурызын баяр-2026 гуравдугаар сарын 22-ны өдөр Сүхбаатарын талбайд болж, Ерөнхий сайд Г.Занданшатар оролцож, баяр хүргэж үг хэлэхдээ казах түмэнд зориулсан үндэсний соёлын төв байгуулахаар болсныг зарлалаа. 

Тэрбээр, Эх орныхоо өнгөрсөн болон өнөө, ирээдүйн хөгжил, дэвшлийн төлөө хөдөлмөрч казахын ард түмний оруулсан хувь нэмрийг үнэлж баршгүй. Улс орны хөгжлийн бүтээн байгуулалт өрнөсөн газар бүхэнд бусдыг үлгэрлэн уриалан дуудаж чаддаг, алдар, гавьяа амжилтын эзэд билээ. Засгийн газраас үндэстний цөөнхийн хэл, соёлыг хамгаалах, өвлүүлэн уламжлуулахад онцгойлон анхаарч Хос хэлний боловсрол, сургалтын талаар баримтлах чиглэлийг баталсан. Ингэснээр Монгол хэлний тухай хуульд заасны дагуу хос хэлний хөтөлбөр боловсруулан хэрэгжүүлж, казах хүүхэд багачууд хос хэлээр боловсрол эзэмших боломж нээгдсэн хэмээгээд Нийслэлийн Сүхбаатар дүүргийн наймдугаар хороонд казах түмний үндэсний соёлын төв байгуулахаар болсныг дуулгахад хурсан олон талархан хүлээн авлаа.

Энэ жил дэлхий даяар 44 улсад хагас тэрбум хүн Наурызын баярыг тэмдэглэж байгаа ажээ. Манай улс 150 мянган казах иргэнтэй бөгөөд тэднийн40 мянга нь Улаанбаатар хотод ажиллаж, амьдардаг байна.