Нийслэлийн иргэдийн Төлөөлөгчдийн Хурлын дарга Д.Ихбаяр Бүгд Найрамдах Солонгос Улсын Пусан хотын Иргэдийн Төлөөлөгчдийн Хурлын дарга Кан Мү Гил тэргүүтэй төлөөлөгчдийг хүлээн авч, албан уулзалт хийлээ.

Уулзалтын үеэр НИТХ-ын дарга Д.Ихбаяр Монгол Улс, Бүгд Найрамдах Солонгос Улсын хооронд 1990 онд дипломат харилцаа тогтоосноос хойш хоёр улсын харилцаа, хамтын ажиллагаа бүхий л салбарт өргөжин хөгжиж ирснийг онцоллоо. Тэрбээр хоёр улсын харилцааг бэхжүүлэхэд орон нутаг хоорондын хамтын ажиллагаа чухал үүрэгтэйг тэмдэглээд, НИТХ болон Пусан хотын Иргэдийн Төлөөлөгчдийн Хурлын харилцаа, хамтын ажиллагааг өргөжүүлэн хөгжүүлэхийн ач холбогдлыг дурдлаа.

Мөн Пусан хотын хот төлөвлөлт, нийтийн тээвэр, байгаль орчны хамгаалал, хог хаягдлын менежмент, цахим засаглал, иргэдэд чиглэсэн төрийн үйлчилгээний туршлагаас харилцан суралцаж, Улаанбаатар хотын хөгжилд нэвтрүүлэх боломжийг судлах нь хамтын ажиллагааны чухал чиглэл болохыг онцлов.

Түүнчлэн хоёр хотын хамтын ажиллагааг төрийн болон орон нутгийн байгууллагын хүрээнээс өргөжүүлж, иргэд, залуучууд, боловсрол, соёл урлаг, спортын салбарын харилцаа, солилцоог хөгжүүлэх нь чухал гэв. Энэ хүрээнд хоёр хотын хурлын ажлын алба болон холбогдох төлөөлөгчдийн түвшинд тогтмол харилцаа тогтоож, харилцан туршлага солилцох уулзалт, сургалт, хамтарсан арга хэмжээ зохион байгуулах боломжийг судлан ажиллахаар санал дэвшүүлэв.

Пусан хотын Иргэдийн Төлөөлөгчдийн Хурал нь нийт 48 гишүүнтэй бөгөөд долоон байнгын, зургаан тусгай хороотой ажилладаг байна.