Энэхүү үзэсгэлэн нь ОХУ-ын Ерөнхийлөгч В.В.Путины “Ард түмний эв нэгдлийн жил” хэмээн 2026 оныг зарласан арга хэмжээний хүрээнд Москвагийн Кремлийн музейн 220 жилийн ойд зориулан гаргаж буй томоохон үзэсгэлэн юм. Мөн Их Монгол Улсыг үндэслэн байгуулагч Эзэн Чингис хааны нэрээр нэрлэгдсэн ОХУ дахь анхны албан ёсны үзэсгэлэн ажээ.

Кремлийн ордны Успескийн хонхот цамхаг, Патриархын цогчин сүмийн танхимд дэлгэгдсэн үзэсгэлэнд Москвагийн Кремлийн музей, Улсын Эрмитаж, Улсын түүхийн музей, Ш.Маржанигийн соёлын сан, Санкт-Петербург дэх Үндэсний Номын сан, Оросын музей зэрэг оросын түүх соёлын 10 гаруй байгууллагад хадгалагдаж буй Монголын эзэнт гүрэн, Алтан Орд улсын түүхэнд холбогдох 150 гаруй шилмэл үзмэр оролцож байна. Өөрөөр хэлбэл өнөөгийн Оросын нутагт хадгалагдаж үлдсэн Чингис хааны удмынхантай шууд холбогдох түүхэн өв дурсгал гэж баттай хэлж болох олон үзмэр анх удаа үзэгчдийн хүртээл болж байгаа юм. 

Тус үзэсгэлэн нь Оросын түүх бичлэг дэх Монголын эзэнт улс, Чингис хааны удмынханы Оросын түүхэн дэх үүрэг байр суурь, тэдний харилцааны асуудлыг цоо шинээр авч үзэх боломж олгож байгаагаараа түүхэн ач холбогдолтой юм. 

”Чингис хааны үр сад: Оросууд ба даян дэлхий” үзэсгэлэн 7 дугаар сарын 19-ний өдрийг хүртэл Москвагийн Кремлийн музейд дэлгэгдэх бөгөөд олон нийтэд зориулсан лекц, тайлбарт аялал, боловсролын хөтөлбөрүүд зэрэг цуврал олон арга хэмжээ зохион байгуулагдах аж.