Нийслэлийн Иргэдийн Төлөөлөгчдийн Хурлын Ээлжит VIII хуралдаанаар “Сэлбэ ухаалаг хот” эдийн засгийн тусгай бүс байгуулахыг дэмжих тухай тогтоолын төслийг өнөөдөр /2026.08.10/ дэмжлээ. Хуралдаанд, Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Б.Мөнхбат төслийг танилцуулсан юм.

“Сэлбэ дэд төв” төслийг Чингэлтэй дүүргийн 14,18 дугаар хороо, Сүхбаатар дүүргийн 14 дүгээр хорооны нутаг дэвсгэрийг хамарсан 158 га талбайд 2024-2029 онд хэрэгжүүлэхээр төлөвлөжээ. Нийт 113 блок, 8,575 өрхийн орон сууц барих бөгөөд иргэд оршин суугаа газраасаа 20 минутад өдөр тутмын хэрэгцээний болон нийгмийн, төрийн суурь үйлчилгээг авах боломжтой, инженерийн дэд бүтэц бүхий цогц хороолол байгуулах юм. Танилцуулгад дурдсанаар, 2026 оны долдугаар сарын байдлаар төслийн нийт гүйцэтгэл 36.35 хувьтай байна. Үүнээс ТЭЗҮ, зураг төслийн ажил 96 хувь, гүйцэтгэгч сонгон шалгаруулалт 83 хувь, газар чөлөөлөлт 95.5 хувь, инженерийн дэд бүтэц, эх үүсвэрийн ажил 24 хувь, орон сууцны барилга угсралтын ажил 19 хувьтай үргэлжилж байна. Түүнчлэн төслийг хэрэгжүүлснээр 45 мянган иргэн орон сууцанд орж, 16 мянга орчим ажлын байр бий болохоор тооцжээ.

Хэлэлцүүлгийн үеэр НИТХ-ын төлөөлөгчид төслийн санхүүжилт, орон сууцны борлуулалтын нөхцөл, үнэ, эдийн засгийн тусгай бүсийн татварын орчин болон бусад дэд төвүүдийн хөгжлийн бодлоготой уялдуулах асуудлаар асуулт тавьж, санал гаргав.

НИТХ-ын төлөөлөгч Ү.Оюунзул төслийг агуулгын хувьд дэмжиж байгаагаа илэрхийлээд, орон сууцны борлуулалтын нөхцөл, ипотекийн зээлийн хүртээмж болон эдийн засгийн тусгай бүсийн хүрээнд татварын хөнгөлөлт үзүүлэх эсэхийг тодрууллаа.  Үүнд, Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Б.Мөнхбат, орон сууцны борлуулалтын хэд хэдэн хувилбар, урьдчилгаа болон зээлийн нөхцөлийг судалж буйг хэллээ. Одоогоор борлуулалтын үнийг эцэслэн тогтоогүй байна гэв.

НИТХ-ын төлөөлөгч Б.Хуягбаатар, Сэлбэ дэд төвийг эдийн засгийн тусгай бүс болгон хөгжүүлэхийн зэрэгцээ нийслэлийн бусад дэд төвүүдийн хөгжлийг хэрхэн уялдуулах, орон сууцны үнийг зах зээлийн үнэтэй уялдуулахад анхаарах шаардлагатайг онцоллоо.

Энэ талаар Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Б.Мөнхбат нийслэлийн эрх зүйн байдлын тухай хуулийн хүрээнд зохицуулалт хийх бөгөөд Сэлбэ дэд төвийг эдийн засгийн тусгай бүс болгон хөгжүүлэх асуудлыг эхний ээлжинд оруулж ирж байгааг тайлбарлав.

Харин НИТХ-ын төлөөлөгч Ж.Батбаясгалан, Сэлбэ дэд төв төслийн талаарх олон нийтийн ойлголтыг нэмэгдүүлэх, хэрэгжилтийг бодит үр дүнд хүргэхэд НИТХ, нийслэлийн байгууллагууд нэгдсэн байр суурьтай ажиллах шаардлагатайг хэллээ.

НИТХ-ийн төлөөлөгч Д.Отгонсүрэн төслийг зарчмын хувьд дэмжиж байгаагаа илэрхийлээд, инженерийн дэд бүтэц болон төрийн дэмжлэгт тулгуурлан эдийн засгийн идэвхжил, татварын орлогыг нэмэгдүүлэх боломжтойг онцлов. Мөн эдийн засгийн тусгай бүсийн эрх зүйн орчныг боловсронгуй болгож, цаашид тусгай хууль эрх зүйн зохицуулалт шаардлагатайг хэлж, дотоод, гадаадын хөрөнгө оруулалтыг татахад анхаарах санал гаргалаа.

Ийнхүү “Сэлбэ ухаалаг хот” эдийн засгийн тусгай бүс байгуулахыг дэмжих тухай тогтоолын төслийг НИТХ-ын ээлжит VIII хуралдаанаар дэмжлээ.

Төсөл батлагдсантай холбогдуулан Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Сэлбэ ухаалаг хот төсөл нь Улаанбаатар хотын төвийн бүсийн янданг цөөлж байгаа ач холбогдолтой төсөл юм. Ухаалаг хотын гол бодлогуудын нэг нь бизнесүүдийг хэрхэн дэмжих вэ гэдэгт оршино. Холбогдох хуульд зааснаар хөдөө аж ахуй, дэд бүтэц, технологи, эдийн засгийн тусгай бүсүүдийг байгуулах боломжтой. Сэлбэ дэд төв нь технологи, эдийн засгийн тусгай бүс болох бүрэн боломжтой юм. Ингэснээр Сэлбэ дэд төвийн газрын төлөвлөлттэй холбоотой ямар нэг өөрчлөлт гарахгүй. Тухайлбал, 158 га газрын 40 га-д нийгмийн байгууламжууд барихаар төлөвлөсөн бөгөөд ногоон байгууламж, хүүхдийн тоглоомын талбай, автомашины зогсоол, сургууль, цэцэрлэгийн төлөвлөлтөд ямар нэг өөрчлөлт орохгүй.

Тус бүсэд нийт 420 бизнес үйл ажиллагаа явуулах боломжтой. Эдийн засгийн тусгай бүс болсноор бизнесүүд тодорхой хугацаанд татварын болоод татварын бус дэмжлэгүүдийг эдэлнэ. Тухайлбал, үл хөдлөх хөрөнгийн албан татвар, нийслэл хотын албан татвар, барилгын татвар газрын төлбөр, цахилгаан, дулааны түрээснээс чөлөөлөх зохицуулалттай. Мөн банкны хөнгөлөлттэй зээл болон ЖДҮ-ийг дэмжих зээлүүдэд хамрагдах боломжтой болно. Зөвшөөрөл авах хугацаа шуурхай болох давуу талтай. Энэ бүсэд бизнесүүд хөгжих орчин бий болсноор 20 минутын хот бодлого биелж, иргэд аятай тухтай амьдрах орчин бүрдэх юм. Мөн ухаалаг хот хэрэглээндээ ухаалаг, ногоон хөгжлийн үзэл санааг агуулсан байх шаардлагатай. Тухайлбал, орчин үеийн ухаалаг тоолуур, ус, эрчим хүчийг хэмнэх зохион байгуулалттай, үйлчилгээ нь цахим платформ дээр нэгдсэн байх шаардлагатай юм. Хот, тосгоны эрх зүйн байдлын тухай хуулиар сэндбокс /шинээр нэвтэрч байгаа технологид суурилсан бүтээгдэхүүн, үйлчилгээг хязгаарлагдмал хүрээг хамарсан бодит орчин, тодорхой цаг хугацаанд турших/ орчныг бүрдүүлнэ. Цахим хөгжил, инновац, харилцаа холбооны яаманд 110 компани бүртгүүлсэн байна. Сэндбокс орчныг Сэлбэ ухаалаг хотод байгуулснаар эдгээр компани нээлттэй үйл ажиллагаа явуулах боломжтой болно” гэлээ.