Прагийн амьтны хүрээлэн үүсгэн байгуулагдсаны 95 жилийн ой, “Тахийг эргэн нутагшуулах” төслийн 15 жилийн ойг 2026 оны 9 дүгээр сарын 28-ны өдөр Прагийн амьтны хүрээлэнд тэмдэглэн өнгөрүүлэв.

Ойн арга хэмжээнд Монгол Улсаас Чех Улсад суугаа Элчин сайд Б.Болормаа оролцож, нэгэн цагт байгальд устаж үгүй болсон тахийг хамгаалах, өсгөн үржүүлэх, Монголын байгальд эргэн нутагшуулах үйлсэд олон жилийн турш үнэтэй хувь нэмэр оруулж ирсэн Прагийн амьтны хүрээлэнгийн хамт олонд талархал илэрхийлэв.

Тэрбээр Монголын байгаль, үндэсний өвийн салшгүй хэсэг болох тахийг хамгаалах, өсгөн үржүүлэх, эх нутагт нь эргэн нутагшуулах чиглэлээр хэрэгжүүлсэн олон жилийн хамтын ажиллагаа нь Монгол, Чехийн найрамдал, түншлэлийн харилцааны бодит бэлгэ тэмдэг болсныг тэмдэглэв.

Тахийг эргэн нутагшуулах олон улсын хамтын ажиллагааны хүрээнд 2011–2019 онд Прагийн амьтны хүрээлэн Чехийн Агаарын цэргийн хүчин болон Монголын холбогдох байгууллагуудтай хамтран 9 удаагийн тээвэрлэлтээр нийт 34 тахийг Монголд хүргэсэн юм. Өдгөө Монголын гурван бүсэд 800 гаруй тахь өсөн үржиж  байна. Прагийн амьтны хүрээлэн монголын талтай хамтран Дорнод аймгийн Нөмрөгийн дархан цаазат газрын Сүмийн хоолойд тахийг эргэн нутагшуулах бэлтгэл хангаж байна.  Энэхүү төслийг Монгол Улсын Ерөнхийлөгчийн ивээл дор хэрэгжүүлэхээр шийдвэрлэснийг Монгол Улсын Ерөнхийлөгчийн Тамгын газрын даргын 2026 оны 5 дугаар сарын 20-ны өдрийн 85 дугаар захирамжаар баталгаажуулсан билээ. 

Ойн арга хэмжээний үеэр Элчин сайд Б.Болормаа энэхүү шийдвэрийг олон нийтэд танилцуулж, захирамжийн баталгаажуулсан хуулбарыг Прагийн амьтны хүрээлэнгийн захирал Ленка Поляковад албан ёсоор гардуулан өгөв.  Арга хэмжээнд Бүгд Найрамдах Казахстан Улсаас Бүгд Найрамдах Чех Улсад суугаа Элчин сайд Кайрат Абдрахманов оролцож, тус улсад тахийг эргэн нутагшуулах төслийн талаар мөн танилцуулав.