Сонгуулийн ерөнхий хорооноос сонгуулийн боловсрол олгох, сонгуулийн эрх зүйг хөгжүүлэх, судлаачдыг бэлтгэх зорилгоор нийгмийн ухааны мэргэжилтэн бэлтгэж буй их дээд сургуулиудтай хамтран ажилладаг. Энэ хүрээнд МУИС-ийн Улс төр судлал, олон улсын харилцаа, нийтийн удирдлагын сургуулийн "Монголын улс төр" хичээлд Сонгуулийн ерөнхий хорооны Улс төрийн мэдээлэл, арга зүйн газрын референт П.Алтанчимэг оролцож, оюутнуудад улс төр, сонгууль дахь хиймэл оюун ухааны хэрэглээ, түүнийг хэрхэн зохицуулж буй тухай мэдээлэл хийж, хэлэлцүүлэг өрнүүлэв.

Тэрбээр оюутнуудад технологийн хөгжил, тэр дундаа хиймэл оюун ухааны (AI), түүнийг дэлхийн улс орнууд улс төр, сонгуульд хэрхэн хэрэглэж, эрх зүйн зохицуулалтыг хийж буй талаар ярилцлаа. Оюутнуудын зүгээс төрийн байгууллага, сонгуулийн зохион байгуулалт, улс төрийн намууд болон сошиал орчин дахь хиймэл оюун ухааны хэрэглээ, түүнтэй холбоотой боломж, сорилтын талаар асуулт асууж, хэлэлцүүлэг өрнүүлж байгаа нь цаг үеэ олсон сонирхолтой яриа боллоо. Хиймэл оюун ухаан нь улс төр судлалд сонгогчийн зан төлөв, мэдээллийн урсгал, шийдвэр гаргалтын үйл явцыг илүү нарийвчлалтай шинжлэх боломж олгодог ач холбогдолтой талаар ярилцлаа.

Хиймэл оюун ухааны гол түүхий эд болох дата мэдээллийн талаар мөн яригдсан бөгөөд Сонгуулийн ерөнхий хорооноос өөрт байгаа дата мэдээллийг нээлттэй өгөгдлийн форматаар opendata.gov.mn болон Хорооны албан ёсны цахим хуудас m-election.mn цахим хуудсанд нээлттэй байршуулж байгааг онцоллоо.

Цаашид тус Хороо нь Үндэсний төв номын сантай хамтран хэрэгжүүлж буй “Сонгуулийн боловсрол, эрх зүйн” уншлагын танхимд сонгуулийн боловсрол олгох сургалт, уулзалт, арга хэмжээг их дээд сургууль, ерөнхий боловсролын сургуультай хамтран нээлттэй зохион байгуулна.

Эх сурвалж: Сонгуулийн ерөнхий хороо