Монгол Улсын Шинжлэх ухааны академийн ерөнхийлөгчийн 2026 оны А/34 дүгээр тушаалаар дотоодын эрдэм шинжилгээний сэтгүүлийн жагсаалтыг шинэчлэн баталжээ. Уг жагсаалтад “Сонгуулийн боловсрол” онол, арга зүйн сэтгүүлийг дотоодын эрдэм шинжилгээний сэтгүүлийг бүртгэлээ.

Ингэснээр Сонгуулийн ерөнхий хорооноос улирал тутам эрхлэн гаргадаг “Сонгуулийн боловсрол” онол, арга зүйн сэтгүүл нь сонгуулийн боловсрол, сонгуулийн эрх зүйн чиглэлээрх анхны академик сэтгүүл болж байна. Их, дээд сургуульд магистр, докторын зэрэг хамгаалахаар суралцаж буй судлаачид “Сонгуулийн боловсрол” онол, арга зүйн сэтгүүлд эрдэм шинжилгээний өгүүллээ хэвлүүлж, судалгааны бүтээлд тооцуулах боломж бүрдэж байгаа юм.

“Сонгуулийн боловсрол” онол, арга зүйн сэтгүүлийн редакцад Академич, Хууль зүйн шинжлэх ухааны доктор, профессор Ж.Амарсанаа зөвлөдөг бөгөөд редакцын бүрэлдэхүүнд Академич, Эдийн засгийн шинжлэх ухааны доктор, профессор Т.Дорж, Академич, Хөдөө аж ахуйн шинжлэх ухааны доктор, профессор Ч.Содномцэрэн, Философийн шинжлэх ухааны доктор, профессор Д.Дашпүрэв, Хууль зүйн доктор, профессор Д.Даваа-Очир, Хууль зүйн доктор, профессор Д.Гангабаатар, Бизнесийн удирдлагын доктор, профессор З.Сүхбаатар, Улс төр судлалын доктор О.Хатанболд, Хууль зүйн доктор, профессор А.Эрдэнэцогт болон Хууль зүйн магистр Д.Бат-Эрдэнэ, “Сонгогчдын боловсрол төв” ТББ-ын Гүйцэтгэх захирал С.Оюунтуяа, “Чимид сан”-ийн Тэргүүн Ч.Сайнсанаа, “Сонгуулийн боловсрол” клубийн Удирдах зөвлөлийн ахлагч С.Уянга нарын эрдэмтэн, судлаачид ажилладаг.

“Сонгуулийн боловсрол” онол, арга зүйн сэтгүүлийн Сонгуулийн ерөнхий хороо, Үндэсний номын сан болон 21 аймаг, 9 дүүрэг, сумдын номын сангаас төдийгүй Сонгуулийн ерөнхий хорооны m-election.mn цахим сайтын “Сонгогч танаа” булангаас цахим хувилбараар унших, татаж авах боломжтой.

Монгол Улсын Оюуны өмчийн газар “Сонгуулийн боловсрол” онол, арга зүйн сэтгүүл” барааны тэмдгийг Сонгуулийн ерөнхий хороонд эзэмшүүлсэн бөгөөд тогтмол эрхлэн гаргадаг сонин, сэтгүүлд олгодог олон улсын стандарт дугаар ISSN-31064078 эзэмшдэг юм.

Эх сурвалж: Сонгуулийн ерөнхий хороо