Монгол Улсын Засгийн газар, АНУ-ын Мянганы сорилтын корпорац хооронд байгуулсан II Компакт гэрээний буюу Усны Компактын хэрэгжилтийн таван жилийн тоолуур 2026 оны 3 дугаар сарын 31-ний өдөр дуусаж, үр дүнгээ хэлэлцлээ.
Төслийн хүрээнд Монголын анхны томоохон Хаягдал ус дахин боловсруулах үйлдвэрийг 2026 оны 3 дугаар сарын 16-нд албан ёсоор нээж, цэвэр усыг хэмнэх, дулааны цахилгаан станцуудыг техникийн усаар хангах шинэ боломж бүрдүүллээ.
Энэ нь Монгол Улсын эрчим хүчний салбарт дахин боловсруулсан ус ашиглах анхны томоохон туршлага болоод зогсохгүй, цаашид аж үйлдвэрлэлийн бусад олон салбарт дахин боловсруулсан усны хэрэглээг нэвтрүүлэх, гүний усны нөөцөө хэмнэж, ирээдүй хойчдоо хадгалж үлдээх, улмаар Туул голын экосистемийг тэтгэх үнэлж баршгүй ач холбогдолтой юм. Төслийн үр дүнд Монгол Улсын усны бодлогын нэгэн томоохон зорилт биеллээ олж байгаа бөгөөд Монгол Улсын хувьд ус хангамжийн цоо шинэ эх үүсвэрийг бий болгож байна.
Дэд бүтцийн хоёр томоохон төслийн нэг Ус хангамжийн баруун эх үүсвэрийг шинээр байгуулах төслийн хүрээнд Улаанбаатар хотын ус хангамжийн хамгийн том эх үүсвэр болон анхны Ус гүн цэвэршүүлэх үйлдвэрийг байгуулаад байна. Ус гүн цэвэршүүлэх үйлдвэрийн туршилт тохируулга үргэлжилж байгаа бөгөөд ирэх 5 дугаар сард нээлтээ хийхэд бэлэн болоод байгаа юм. Улаанбаатар хотын иргэд одоогоор цэвэр усны долоон эх үүсвэрээс жилдээ 55 сая шоо метр ус авч хэрэглэдэг. Шинэ эх үүсвэр болон үйлдвэр ашиглалтад орсноор жилд 50 хүртэл сая шоо метр буюу Улаанбаатар хотын унд ахуйн нэг жилийн хэрэглээтэй дүйцэхүйц хэмжээний усыг төвийн шугамд нийлүүлэх юм. Үр дүнд нь Улаанбаатар хотын ус хангамжийг баталгаажуулах, нийслэл хот баруун тийш өргөжин тэлэх, эдийн засгийн өсөлтийг дэмжихэд томоохон хувь нэмрийг оруулна.
Үүнээс гадна төслийн хүрээнд зөвхөн дэд бүтэц байгуулахаас гадна Улаанбаатар хотын ус хангамжийн тогтвортой байдлыг бататгахад чиглэсэн зөөлөн дэд бүтцийн төслийг мөн хэрэгжүүлсэн. Энэ хүрээнд усны салбарын институтийн тогтолцоо, хууль эрх зүйн орчин, бодлого зохицуулалтыг сайжруулах, салбарын байгууллагуудын чадавхыг бэхжүүлж, техникийн туслалцаа үзүүлэх, үйлдвэрүүдийг цаашид авч явах УСУГ-ын санхүүгийн болон хүний нөөцийн чадавхыг сайжруулахад чиглэсэн техникийн туслалцаа үзүүлэх таван дэд төсөл, үйл ажиллагааг амжилттай хэрэгжүүлж дуусаж байгаа юм.
Ийнхүү Монгол Улсын усны салбарт сүүлийн 30 жилийн хамгийн том хөрөнгө оруулалт бодит үр дүнд хүрч, Улаанбаатар хотын ус хангамжийг шинэ шатанд гаргасан стратегийн ач холбогдолтой төсөл амжилттай хэрэгжиж өндөрлөлөө.
Одоогоос таван жилийн өмнө буюу 2021 оны 3 дугаар сарын 31-ний өдөр хүчин төгөлдөр болж, таван жилийн тоолуураа эхлүүлж байсан Усны Компактын төсөл, хөтөлбөр ийнхүү товлосон хугацаа, батлагдсан төсөвтөө бүрэн нийцүүлэн амжилттай хэрэгжиж дуусаж байна.
Эх сурвалж: Мянганы Сорилтын Сан
0 сэтгэгдэл