Монгол Улсаас ЮНЕСКО-гийн дэргэд суугаа Байнгын төлөөлөгчийн газар, Байгаль орчин, уур амьсгалын өөрчлөлтийн яам, ЮНЕСКО хамтран “НҮБ-ын Цөлжилттэй тэмцэх тухай конвенц (UNCCD)-ийн Талуудын 17 дугаар бага хуралд (COP17) ЮНЕСКО-гийн оролцоо” сэдэвт мэдээллийн уулзалтыг Парис хотноо ЮНЕСКО-гийн төв байранд 3 дугаар сарын 31-ний өдөр зохион байгууллаа.

Тус уулзалтыг ЮНЕСКО-гийн Байгалийн шинжлэх ухааны салбарын Ерөнхий захирлын орлогч хатагтай Лидия Брито нээж, COP17 бага хурлын хүрээнд ЮНЕСКО-гийн гүйцэтгэх үүрэг, тэргүүлэх чиглэлүүдийг танилцуулав. Монгол Улсаас Байгаль орчин, уур амьсгалын өөрчлөлтийн дэд сайд Б.Мөнхтамир, мөн тус яамны Гадаад хамтын ажиллагааны газрын дарга Д.Ариунтуяа нар оролцож, Монгол Улс COP17 бага хурлыг зохион байгуулах бэлтгэл ажил болон дэвшүүлж буй санаачлагуудыг дэлгэрэнгүй мэдээлэл хийлээ.

Уулзалтаар Монгол Улсаас дэвшүүлж буй “Тал нутгийн үйл ажиллагааны хөтөлбөр” (Steppe Action Agenda), “Бэлчээрийн тогтвортой менежментийн санаачлага”, “Ус-Газрын нэгдсэн менежментийн санаачлага”, “Байгальд суурилсан шийдлүүдэд тулгуурласан тогтвортой дэд бүтцийн санаачлага” зэрэг нь уур амьсгалын өөрчлөлт, цөлжилт, газрын доройтол, усны хомсдол зэрэг дэлхийн тулгамдсан асуудлыг шийдвэрлэхэд чиглэсэн цогц, хамтын ажиллагаанд суурилсан механизм болохыг онцлов.

Түүнчлэн эдгээр санаачилгууд нь зөвхөн Монгол Улсын төдийгүй дэлхийн улс орнууд, иргэдийн нийтлэг ашиг сонирхолд нийцсэн, байгаль орчны тогтвортой байдал, хүнсний аюулгүй байдал, эдийн засгийн тогтвортой өсөлтийг дэмжих ач холбогдолтойг тэмдэглэлээ.

Энэхүү уулзалтад ЮНЕСКО-гийн гишүүн орнуудын Байнгын төлөөлөгчид, олон улсын байгууллагын төлөөлөл өргөнөөр оролцож, санал бодлоо солилцон асуулт хариултын хэлэлцүүлэг өрнүүлэв.

Монгол Улсаас ЮНЕСКО-гитйн дэргэд суугаа Элчин сайд, Байнгын төлөөлөгч У.Нямхүү хаалтын үг хэлэхдээ COP17 бага хуралд улс орнууд өндөр түвшний оролцоогоо хангах ач холбогдлыг тэмдэглэж, гишүүн орнуудыг дэвшүүлж буй санаачлагуудыг дэмжин хамтран ажиллахыг уриалав.

Монгол Улс НҮБ-ын Цөлжилттэй тэмцэх тухай конвенцын Талуудын 17 дугаар бага хурлыг 2026 оны 8 дугаар сарын 17-28-ны өдрүүдэд Улаанбаатар хотноо зохион байгуулах бөгөөд уг хурал нь газар, ус, уур амьсгалын асуудлаарх дэлхийн хамтын ажиллагааг шинэ шатанд гаргах чухал үйл явдал болох юм.