УИХ дахь МАН-ын бүлгийн хагарал УИХ-ын даргыг сонгох асуудлаас болж цааш үргэлжлэх нь тодорхой боллоо. 30:38 хэмээн хуваагдал үүсээд байгаагийн цөөнх буюу УИХ-ын дарга асан Д.Амарбаясгалан, Ерөнхий сайд асан Л.Оюун-Эрдэнэ нарын 30 талын гишүүд шинэхэн томилогдсон Ерөнхий сайд Н.Учралын байгуулах Засгийн газрыг дэмжихгүй гэсэн байр суурь баримталж байгаагаа ил тод зарлалаа.

Тужхайлбал, УИХ-ын гишүүн П.Сайнзориг, УИХ-ын даргаар С.Бямбацогтыг сонгож байгаа бол 30-ын бүлэг хэдэн ч сайдын суудал амласан авахгүй, Засгийн газарт орж ажиллахгүй гэсэн бол УИХ-ын гишүүн А.Ариунзаяа, Улс төрийн өшөө авалтаа одоо зогсоо.  Анх намын удирдлагыг дэмжиж, эв нэгдлийг эрхэмлэхээр тохиролцсон ч бодит байдал дээр улс төрийн өшөө авалт, хонзон авах ажиллагаа зогсохгүй даамжирч байна гэж мэдэгдэв.

Мөн УИХ-ын гишүүн М.Энхцэцэг, Эвлэрнэ гэдэг бол эрх ашгийг хангах, эрх мэдлээ хуваалц гэсэн үг. Тэрнээс бус "хоёр даргаа хоёуланг нь манайх авна, бүх эрх мэдлийг би авна, чи цэрэг бол" гэсэн хандлагаар явбал улс төр ч тэр Засгийн газар ч тэр маш хэврэг болно гэжээ.

УИХ-ын гишүүн Х.Баасанжаргал мөн "Би С.Бямбацогтыг дэмжихгүй, нам доторх өөр үзэл бодолтой гишүүдээ хүлээн зөвшөөрдөггүй хүн бүхэл бүтэн таван улс төрийн намыг зангидаж чадахгүй" гэж мэдэгдсэн байна.

Үүнээс УИХ дахь МАН-ын бүлгийн цөөнх 30-ын бүлэг нь АН-ын бүлэгтэй хамтарсан улс төрийн тоглолт хийвэл шинэхэн Ерөнхий сайд Н.Учрал танхимаа бүрдүүлж чадахгүйд хүрэх, улмаар удалгүй огцорч ч мэдэх нөхцөл байдал үүсэхээр байна. Энэхүү тоглолтод Н.Номтойбаяраар удирдуулсан "Үндэсний эвсэл" мөн нэгдэх магадлалтай юм.

Ерөнхий сайд Н.Учралын хувьд УИХ-ын даргаа олонх бүлэгтээ өгөөд Засгийн газарт цөөнхийн бүлгээсээ түлхүү оруулах, МАН-ын Ерөнхий нарийн бичгийн даргын суудлыг УИХ-ын дарга асан Д.Амарбаясгалан, Ерөнхий сайд асан Л.Оюун-Эрдэнэ нарын талд найр тавих зэрэг өөр тохиролцоо байж болох бөгөөд тэгвэл намын эв нэгдлээ нэг хэсэгтээ хангаж, суудалдаа ч тогтож чадах юм.