Ням гарагт Пакистанд болсон АНУ, Ираны хэлэлцээгээр талууд тохиролцоонд хүрч чадаагүй гэж Ираны Гадаад хэргийн яамны төлөөлөгч Эсмаил Багаи мэдэгджээ.
Түүний өгүүлснээр, сөргөлдөөн эхэлснээс хойш 40 орчим хоногийн дараа болсон хэлэлцээ үл итгэлцэл дүүрэн уур амьсгал дунд болж өнгөрсөн ажээ. Энэ хэлэлцээний үндсэн сэдвүүд нь Ормузын хоолой, цөмийн хөтөлбөр, хориг арга хэмжээг цуцлах, Ираны эсрэг болон бүс нутагт байлдааны ажиллагааг бүрэн зогсоох асуудал байсан байна.
Исламабад хотод болсон Иран, Америкийн төлөөлөгчдийн хэлэлцээ нь Иран, АНУ-ын хооронд 04 дүгээр сарын 08-ны өдөр гал зогсоосны дараа Ойрх Дорнод дахь хурцадмал байдлыг намжаах зорилготой байсан ч ийнхүү амжилтгүй болов.
АНУ-ын талыг ахалж оролцсон дэд ерөнхийлөгч Жи Ди Венс мөн хэлэлцээ амжилтгүй болсон талаар Исламабадад товч мэдээлэл хийж, нутаг буцах болсноо мэдэгджээ.
Улмаар АНУ-ын тал 4 дүгээр сарын 13-наас Ираны эргийн дагуу далайн тээврийн хөдөлгөөнийг хязгаарлах, "далайн бүслэлт" ажиллагаа эхэлснээ зарлалаа. Тус ажиллагаа Ираны боомтоор орж, гарч буй бүх хөлөг онгоцонд хязгаарлалт тавих ажээ.
0 сэтгэгдэл