Ерөнхийлөгчийн санаачилсан Үндсэн хууль зөрчсөн, ёс зүйн зөрчил гаргасан УИХ-ын гишүүнийг Үндсэн хуулийн цэцийн эцсийн дүгнэлтээр эгүүлэн татах агуулгатай өөрчлөлтийг УИХ-ын тухай хуульд нэмэлт өөрчлөлт байдлаар оруулах хуулийн төслийн хэлэлцэх эсэхийг энэ пүрэв гарагт УИХ-ын чуулганы нэгдсэн хуралдаанаар хийнэ.
Гэвч Ерөнхийлөгчийн санаачилсан хуулийн төслийг УИХ дээр дэмжихгүй унагах магадлалтай болжээ. УИХ дахь МАН-ын бүлгийн 30 гаруй гишүүн, Үндэсний эвсэл, ХҮН намын зөвлөл болон АН-ын намын 42 гишүүний талаас илүү хувь нь уг хуулийн төслийг парламентын ардчиллын дархлааг эвдэх, цаашид Ерөнхийлөгч болон улс төрийн намын дарга нарын үгэнд ороогүй гишүүдийг эгүүлэн татна хэмээн айлгаж дарамтлах, улмаар үгэндээ ороогүй гишүүдийг үзэмжээрээ солих үүд хаалгыг нээх эрсдэлтэй, тиймээс дэмжихгүй гэдгээ илэрхийлээд байна.
Хуулийн төслийг дэмжих талд МАН-ын бүлгийн 30 гаруй гишүүн+АН-ын 10 гаруй гишүүн ил тод байна. УИХ-ын дарга С.Бямбацогтын хувьд өнгөрсөн 7 хоногт намын бүлгийн гишүүдтэйгээ уулзахдаа Ерөнхийлөгчийн санаачилсан хуулийн төсөл батлагдвал Үндсэн хууль зөрчсөн маргаанд татан оролцуулах эрсдэлтэй байгааг дурджээ.
МАН дахь Ерөнхий сайд асан Л.Оюун-Эрдэнэ, УИХ-ын дарга асан Д.Амарбаясгалангийн талын гишүүд Ерөнхийлөгчийн хуулийн төслийг ил тод эсэргүүцэж, Монголын улсын парламентын арчиллын тогтолцоог нураах, улмаар нэг хүний дарангуйлал тогтоох хор нөлөөтэй хэмээн мэдэгдсээр байна.
УИХ-ын гишүүн Л.Оюун-Эрдэнэ саяхан нийгмийн сүлжээ дэх өөрийн цахим хуудастаа бичсэн "Парламент VS Монарх" нийтлэлдээ,
АН-ын дарга О.Цогтгэрэл, Ардчилсан парламент үгүй болох юм бол Монгол хүний эрх чөлөө, дархлаа үгүй болно. Ардчилсан нам, бүлэг Ерөнхийлөгчийн өргөн барьсан хуулийг үзэл баримтлалын хүрээнд дэмжихгүй гэсэн бол УИХ-ын гишүүн Ч.Лодойсамбуу "Монгол Улсын Ерөнхийлөгч алдаа гаргаж байна. Алдаагаа засаж хуулиа татах бүрэн боломж байгаа" гэж мэдэгдээд байна.
Харин нөгөө талд Ерөнхийлөгчийн Тамгын газар хуулийн төслийг нэн даруй хэлэлцээд явах шаардлагатай, УИХ-ын гишүүд ёс зүйтэй, хариуцлагатай байвал парламентын дархлаа бэхжиж, нэр хүнд өснө. Хуулийн төсөл нь Үндсэн хуулийн суурь зарчмыг хэрэгжүүлэх, ардчилсан парламентын засаглалыг хамгаалах, парламентад ард иргэдийн хяналтыг хэрэгжүүлэх, сахилга, хариуцлага, ёс зүйг сахиулах, шударга ёсыг тогтоох зорилготой юм.Үндсэн хуулинд УИХ-ын гишүүн өргөсөн тангарагаасаа няцаж, Үндсэн хууль зөрчсөн бол эгүүлэн татах тухай заасан ч өнөөдрийг хүртэл энэ заалт хэрэгжих эрх зүйн орчин биеллээ олоогүй хэвээр байна. Тиймээс Монгол Улсын Ерөнхийлөгч төрийн эрх барих дээд байгууллагад сахилга, хариуцлaга, ёс зүй өндөр хэм хэмжээнд байх ёстой гэж үзэн Үндсэн хуулийн энэ заалт хэрэгжих гол зангилаа болсон хуулийн төслийг санаачилсан хэмээсэн хэлэлцүүлгийг идэвхтэй өрнүүж байна.
Ерөнхийлөгчийн санаачилсан хуулийн төсөлд:
- Ёс зүйн зөрчил гаргасан УИХ-ын гишүүнд хуулийн хариуцлага хүлээлгэх боломжийг бүрдүүлэх,
- Өргөсөн тангаргаасаа няцаж, ноцтой зөрчил гаргасан гишүүнийг УИХ-ын Ёс зүйн дэд хороо, УИХ-ын нэгдсэн чуулганаар заавал нээлттэй хэлэлцэж, Үндсэн хуулийн Цэцийн шийдвэрээр эгүүлэн татах,
- Гэмт хэрэг үйлдсэн болох нь шүүхийн эцсийн шийдвэрээр тогтоогдсон бол тухайн гишүүнийг эгүүлэн татах үндэслэл,
- Парламентад суудалтай улс төрийн нам, эвслийн хариуцлагыг өндөржүүлж, жагсаалтаар нэр дэвшиж сонгогдсон гишүүн ёс зүйн ноцтой зөрчил гаргавал эгүүлэн татах үндэслэлийг тус тус тусгажээ.
0 сэтгэгдэл