Дэлхийн урлаг, түүхийн үнэт өвийг арилжаалдаг нэр хүндтэй дуудлага худалдааны байгууллагуудын нэг болох Christie’s-ийн Азийн салбарт болсон ээлжит дуудлага худалдааны үеэр Их Юань улсын үед хамаарах ховор нандин хөх цагаан шаазан ваар түүхэн өндөр үнээр зарагджээ.
“Жиньсян тин” хээ бүхий уг хосгүй бүтээл HK$174.9 сая буюу ойролцоогоор 22.3 сая ам.долларын үнэ хүрсэн нь энэ оны Азийн дуудлага худалдааны зах зээл дэх хамгийн өндөр үнэтэй олдворуудын нэг болж, урлаг судлаачид болон түүхчдийн анхаарлыг татаж байна.
Монголчуудын нөлөө ба хөх цагаан шаазангийн үүслийн тухайд XIII-XIV зуунд Монголчууд Евразийг дамнасан аварга эзэнт гүрнийг байгуулж, улмаар Хятадыг бүхэлд нь нэгтгэн Их Юань улсыг байгуулсан нь зөвхөн улс төр, цэргийн түүхэнд төдийгүй урлаг, соёлын хөгжилд асар их өөрчлөлт авчирсан гэж үздэг.
Түүхчдийн тайлбарласнаар Юань улсын үед Монголын хаад язгууртнууд тэнгэрийг бэлгэдсэн хөх, цэнхэр өнгийг онцгой эрхэмлэдэг байсан нь тухайн үеийн урлаг, хувцас, эдлэл хэрэглэлд хүчтэй нөлөөлжээ. Энэ нөлөө Хятадын уламжлалт шаазан урлалд ч шингэж, өдгөө дэлхийд хамгийн үнэ цэнтэйд тооцогддог “хөх цагаан шаазан”-гийн хэв маяг хүчтэй хөгжихөд түлхэц болсон гэж судлаачид үздэг байна.
Ялангуяа Юань улсын үед Персээс кобальтын будаг импортлон ашиглаж эхэлснээр гүн хөх өнгийн зураглалтай шаазан урлах технологи эрчимтэй хөгжсөн бөгөөд энэ нь хожмын Мин улсын үеийн алдарт цэнхэр-цагаан шаазангийн суурь болсон юм.
Харин “Жиньсян тин” хээний онцлогийн хувьд гэвэл дуудлага худалдаанд тавигдсан уг ваар нь “Жиньсян тин” гэх нарийн хийцтэй уламжлалт хээгээр чимэглэгдсэн байжээ. Энэхүү хэв маяг нь Юань улсын язгууртны хүрээний тансаг хэрэглээнд зориулагдсан, маш ховор ангилалд багтдаг гэж мэргэжилтнүүд онцолсон байна.
Мөн ваарны:
- хадгалалтын байдал маш сайн,
- анхны өнгө, паалан бараг гэмтээгүй,
- урлалын төвшин дээд зэрэглэлд хамаарах,
- гарал үүсэл нь тодорхой зэрэг хүчин зүйлс үнэ цэнийг нь асар өндөрт хүргэжээ.
Сүүлийн жилүүдэд Юань болон Мин улсын үеийн хөх цагаан шаазангийн үнэ дэлхийн зах зээл дээр эрчимтэй өсөж байгаа бөгөөд ялангуяа Монголын эзэнт гүрний үеийн урлагийн дурсгалууд ховордож буйтай холбоотойгоор үнэ цэнэ нь улам нэмэгдэж байнгаа ажэа.
Урлаг судлаачдын хэлж буйгаар ийм төрлийн бүтээлүүд нь зөвхөн гоёл чимэглэлийн эдлэл бус, харин Монголын эзэнт гүрэн Евразийн соёл иргэншлийг хэрхэн холбож, урлагийн шинэ урсгал бий болгосны бодит гэрч хэмээн үнэлэгддэг байна.
0 сэтгэгдэл