ОХУ-ын Пермь хотноо дөрөвдүгээр сарын 14-26-нд зохион байгуулагдсан Екатерина Максимовагийн нэрэмжит "Арабеск-2026" балетын олон улсын XIX уралдаанд Монголын балетчид түүхэнд амжилтыг бүтээжээ.

Дэлхийн "А" зэрэглэлийн энэхүү нэр хүндтэй тэмцээнд оролцох нь өөрөө том амжилт байдаг. Тэгвэл энэ удаагийн уралдаанд Монгол Улсаас хоёр дахь удаагаа МУАЖ Х.Гэрэлчимэг шүүгчээр уригдан оролцсон төдийгүй гоцлол бүжгийн төрөлд Даваадоржийн Бөртэ-Үжин тэргүүн байр буюу Алтан медалийн Лауреат, Бүүвэйбаатарын Оюу дэд байр буюу Мөнгөн медалийн Лауреат, Батжаргалын Төрмөнх гуравдугаар байр буюу Хүрэл медалийн Лауреатаар тус тус шалгарч, дэлхийн нэр хүндтэй тэмцээний шагналын тавцанд зэрэг зогсчээ

Шагналын буухиа үндсэн байруудаар зогсохгүй тусгай шагналуудаар үргэлжилж, Б.Оюу, Б.Төрмөнх нар Галина Улановагийн нэрэмжит "Бүжгийн сэтгэлгээ, дотоод мэдрэмж" (За одухотворенность танца) нэр хүндтэй шагналыг хамтдаа хүртжээ. Мөн тэдний ур чадварыг Хэвлэл мэдээллийн шүүгчид өндрөөр үнэлж, "Приз жюри прессы" шагналыг Б.Оюу, Б.Төрмөнх нарт тус тус олгосон байна.

Түүнчлэн Монгол Улсын Консерваторын оюутан Н.Тэнүүн болон “La Alba" сургуулийн оюутан Г.София нар тус тэмцээнд амжилттай оролцсон юм.

Балетчдын амжилтыг бодит болгоход голлох үүрэг гүйцэтгэсэн дасгалжуулагч багш С.Есөнзаяагийн хөдөлмөрийг олон улсын шүүгчид өндрөөр үнэлж, түүнийг "Шилдэг багш-репетитор" (Лучший педагог-репетитор)-оор нэрлэжээ.