Монголын Үндэсний музейд “ДИЛАВ ХУТАГТ БА ОУЭН ЛАТТИМОР: Тив дамнасан өв” тусгай үзэсгэлэн нээлтээ хийлээ. 

Энэхүү үзэсгэлэнг Америкийн Монгол судлалын төв, “Дилав хутагт” сан, Монголын Үндэсний музей, Монгол Улсын Үндэсний номын сан, Завхан аймгийн Засаг даргын Тамгын газар, Завхан аймгийн музей хамтран зохион байгуулж байна. 

Үзэсгэлэн нь Монголын шашин, төрийн зүтгэлтэн Дилав хутагт Б.Жамсранжав болон Америкийн нэрт монголч эрдэмтэн Оуэн Латтимор нарын нөхөрлөл, амьдрал, ажил үйлс, тэдний үлдээсэн өв нь Монгол Улс, АНУ-ын харилцаанд хэрхэн нөлөөлснийг олон нийтэд таниулан сурталчлахад чиглэж буй бөгөөд нээлтийн үеэр Оуэн Латтиморын ач охин Энн Латтимор Прайс Дилав хутагт Б.Жамсранжавын хэрэглэж байсан, улмаар өвөөд нь бэлэглэсэн шар манан хөөргийг эх оронд нь буцаан ирүүлж буйгаа мэдэгдэж Монголын Үндэсний музейн сан хөмрөгт шилжүүлэн өглөө. 

Дилав хутагт Б.Жамсранжав 1931 онд эх орноосоо гарч, улмаар Хятад, Энэтхэгээр дамжин АНУ-д очиж амьдарч байгаад 1965 онд нас барсан юм.

Эх орноосоо алс газар амьдарсан ч эх орныхоо тусгаар тогтнолд түүхэн тодорхой хувь нэмрээ оруулж, төрийн ч шашны ч үйл хэргээ таслаагүй Дилав хутагт Б:Жамсранжавын амьдрал, үйл хэрэг, түүний итгэлт дотны анд нэрт Монголч эрдэмтэн Оуен Латтиморын нөхөрлөл хувь заяаны барилдлага түүхийг өгүүлэх сонирхолтой үзэсгэлэн 6 дугаар сарын 12-ныг хүртэл үргэлжилнэ.