ОХУ-ын Ерөнхийлөгч Владимир Путин БНХАУ-д албан ёсны айлчлал хийж байна. Тэрбээр мягмар гаргийн үдэш Бээжин хотод хүрэлцэн ирсэн бөгөөд өнөөдөр айлчлалын гол арга хэмжээнүүд болно.

Энэ удаагийн айлчлалд өргөн бүрэлдэхүүнтэй төлөөлөгчид оролцож байгаа аж. Тодруулбал, ОХУ-ын төлөөлөгчдийн бүрэлдэхүүнд 5 шадар сайд, 8 сайд, амбан захирагчид, Ерөнхийлөгчийн захиргаа, банк, томоохон бизнесийн төлөөллүүд багтаж байгаа юс байна. 

Айлчлалын үеэр ОХУ болон БНХАУ хэлэлцээ хийсний дүнд 40 орчим баримт бичигт гарын үсэг зурахаар төлөвлөжээ. 

Владимир Путин, Ши Жинпинь нар хэлэлцээ хийх үеэрээ хоёр талын харилцаа төдийгүй олон улсын асуудлыг хэлэлцэх аж. Тэр дундаа "Сибирийн хүч-2" хий дамжуулах хоолойн төслийг хөндөн ярилцах юм байна. Хийн үнэ дээр тохиролцож чадаагүйн улмаас Хятадын тал өнөөг хүртэл энэхүү төслийг урагшлуулахад бэлэн гэсэн байр суурь илэрхийлээгүй байгаа юм. Хятадын тал Оросын дотоодын зах зээлийн үнэтэй ижил хямд үнээр хий авах сонирхолтой байгаа гэсэн мэдээлэл бий. Энэ нь Европын зах зээл дээрх өнөөгийн ханшаас 12 дахин бага, БНХАУ одоо төлж байгаа үнээс 5 дахин бага үнэ юм. Монгол Улстай холбогдох уг төслийг 2 гүрэн хэрхэн шийдэх нь манайхны анхаарлын төвд байгаа билээ.