Засгийн газраас  өнгөрсөн мягмар гарагт “Рио Тинто”-той хэлэлцээ хийсний үр дүнд “Оюутолгой” төслийн менежментийн төлбөрийг хоёр дахин багасгаж, төлбөрийн давхардлыг арилгах тохиролцоонд хүрлээ. Ингэснээр төлбөрийн зардал 2.2 тэрбум ам.доллараар буурч, Монгол Улсын өгөөж 1.5 тэрбум ам.доллараар нэмэгдэнэ хэмээн мэдэгдэл гаргасан.

Тэгвэл энэ асуудлаар ХЗДХ-ийн дэд сайд болон Засгийн газрын Хэрэг эрхлэх газрын тэргүүн дэд даргаар ажиллаж байхдаа Оюу толгойн хэлэлцээнд гол үүрэгтэй оролцож байсан хуульч Б.Солонгоо байр сууриа илэрхийлжээ.

Тэрбээр,  Рио Тинто компани уул уурхайн компанийн хувьд Оюутолгой төслийг үр ашигтай удирдаж, ашигтай ажиллуулан хувьцаа эзэмшигчдэдээ аль болох хурдан хугацаанд ногдол ашиг тараах үүрэгтэй. Гэтэл энэ үүргээ умартан уул уурхайн компани биш болоод уджээ. Тохижилт үйлчилгээний компани шиг, мөнгө хүүлдэг ломбард, банк бус санхүүгийн байгууллага шиг, пиарын компани шиг л манай улсад ажиллаж байна. Санхүүгийн мөлжлөгийн схемээр манай улсын баялгаас өдөрт 4 сая ам.доллар, жилдээ 1.5 тэрбум ам.долларын ашиг зээлийн хүүгээр хийгээд сууж байна.

Засгийн газар энэ долоо хоногт Оюутолгой компаниас Рио Тинтод төлөх менежментийн төлбөр 2 дахин бууруулсан яриа хэлэлцээний үр дүн гарсан талаар мэдэгдэл хийсэн. Олон жил яригдсан асуудалд ахиц гарсан нь сайшаалтай боловч 1 жилд 70 сая ам.долларын хэмнэлт гарахаар байна. Рио Тинто компанид төлөх менежментийн төлбөрийг 70 сая ам.доллароор бууруулж байгаа ч энэ хэмжээний мөнгийг хагас сарын зээлийн хүүгээр л нөхөх боломжтой. Ногдол ашиг авах хугацааг дорвитой наашлуулах суурь асуудал шийдэгдээгүй гэсэн үг юм. 

Нөгөөтэйгүүр Аж үйлдвэр, эрдэс баялгийн сайд Г.Дамдинням олон нийтийг төөрөгдүүлэхгүй үнэн бодит мэдээлэл өгмөөр байна. Лхагва гаргийн хэвлэлийн хурал дээр Г.Дамдинням сайд 9 хувийн менежментийн төлбөрийг 3.95 хувь болгож буурууллаа гэж мэдэгдсэн. Оюутолгой төслийн суурь гэрээний хаана ч 9 хувь гэсэн тоо байхгүй бөгөөд 6 хувь, 3 хувь гэсэн төлбөр байдаг. 6 хувийн менежментийн төлбөрийг 2 дахин бууруулна гэхээр 3 хувь болж буурах ёстой болов уу. Мөн монголчууд бидэнд ирэх үр өгөөж цаг хугацааны хувьд хэрхэн наашилж байгаа талаар бодитой, зөв мэдээлэл өгөх хэрэгтэй. 

Цаашид хүндээ хөнгөнөөс өгөхгүй байх дээр зайлшгүй анхаарах хэрэгтэй. Монголын баялгийн хамаг өрмийг Рио Тинто хамаад монголчууд бид хусамтай л үлдэх бодит эрсдэл хэвээр байсаар байна. 

Тиймээс Оюутолгой төслийн суурь гэрээнүүдийг өөрчилж, шинэчлэх зайлшгүй шаардлагатай. Хамтдаа Рио Тинто компаниас хариуцлага нэхье. Баялгаасаа ногдол ашиг хүртэх боломж бидэнд байна хэмээжээ.