Дэд сайд асан Б.Солонгоо Монголчууд Оюутолгой төслөөс энэ жил ногдол ашиг авах боломжтой хэмээн өнөөдөр ээлжит мэдэгдлээ хийлээ. Хууль зүй дотоод хэргийн дэд сайдаар ажиллаж байхдаа Б.Солонгоо Оюутолгойн асуудлаар хэлэлцээ хийх Засгийн газрын ажлын хэсгийн нарийн бичгийн даргаар ажиллаж байсан бөгөөд Оюутолгой төсөлд монголчуудын эрх ашгийг хамгаалах чиглэлээр сүүлийн үед тасралтгүй байр сууриа илэрхийлж байгаа юм.

Тэрбээр өнөөдөр сошиал хуудастаа, Монголчууд бид Оюутолгой төслөөс энэ жил ногдол ашиг авах боломжтой.

Оюутолгой компани 2025 оноос ашигтай ажиллаж эхэлсэн, энэ жил 5 тэрбум ам.долларын ногдол ашиг хуваарилж болохуйц ашигтай ажиллахаар байна. Яагаад монголчууд бид ашиг авахгүй байна вэ? Учир нь Рио Тинто компани Оюутолгой төслийн бүх ашгийг 2035/2036 он хүртэл зээлийн хүү нэрийдлээр ховх сорсны дараа бид ногдол ашиг авах санхүүгийн схем угсарсан.

Бидний хүүхэд насны дурсамж шингэсэн хүүхдийн паркийг Рио Тинто 8 сая ам.доллароор тохижуулсан. Нийгмийн хариуцлагын хүрээнд сайхан тохижуулсан хэдий ч Оюутолгой төслөөс өнгөрсөн хугацаанд Рио Тинтогийн авсан 10 гаруй тэрбум ам.долларын ашгийн хажууд задгай мөнгө л юм. Одоо ч гэсэн 6.8 тэрбум ам.долларын хуримтлагдсан хүүнд улирал бүр нэмж хүү тооцоод бидний авч болох ашгийг хойшлуулах санхүүгийн мөлжлөг үргэлжилж байна. Хүү ингэж их хэмжээгээр хуримтлагдахаас гадна Рио Тинто зээлийн хүүгийн төлбөр авдаг. 2025 онд л гэхэд зээлийн хүүнд 240 сая ам.долларыг Оюутолгой компаниас авсан. Хүүхдийн парк тохижуулах зардлыг хагас сарын л зээлийн хүүгээр нөхсөн байна. Дэлхий дээр ямар ч томоохон уул уурхайн төсөл ашигтай ажиллаад зөвхөн нэг хувьцаа эзэмшигч ашиг хүртээд, нөгөө хувьцаа эзэмшигч ашиг хүртэх гээд 20, 30 жил хүлээдэг жишиг байхгүй. 

Оюутолгой компанийн энэ жил хүлээгдэж буй 5 тэрбум гаруй ам.долларын ашгаас ногдол ашиг хуваарилахад бид монголчууд бидний эзэмшлийн 34%-д 1.5 тэрбум ам.долларын ногдол ашиг авах юм. Энэ мөнгөөр Улаанбаатар хотод 200 парк тохижуулах боломжтой. 

Монголын баялгаас монголчууд бид ч ашиг авах бүрэн боломжтой, эрхтэй юм. Ногдол ашиг авах шаардлагыг хамтдаа тавья. 

Оюутолгойн нөөцийг хамтдаа дахин нээе гэсэн байна.