Засгийн газар “Эрх чөлөөний дөрвөн зам, дөрвөн чөлөөлөлтийн бодлого”-ын хүрээнд бүхий л салбарт “Чөлөөлье” үндэсний санаачилгыг хэрэгжүүлэн ажиллаж байгааг Ерөнхий сайд Н.Учрал онцлоод, 100 өдөрт бүхнийг өөрчлөхгүй боловч дуусдаггүй олон яриаг дуусгаж, иргэндээ, хувийн хэвшилдээ, хөдөлмөрлөж буй хэн бүхэнд ээлтэй байх бодлогыг тууштай баримталж ажиллаж буйг онцлов. 

Засгийн газрын 100 хоногийн хугацаанд бодит үр дүнд хүрсэн хэмээн үзэж буй зарим онцлох ажлаас дурдвал: 

• Засгийн газар Рио Тинтотой  хэлэлцээрт түүхэн амжилт гаргаж, Оюу толгой төслийн Монголын талд ногдох өгөөжийг бодитой нэмэгдүүлсэн. Хэлэлцээрийн үр дүнд 30 гаруй их наяд төгрөгийн зардал буурч, Монголын талын хүртэх өгөөж 4 тэрбум ам.доллар буюу 13 их наяд төгрөгөөр нэмэгдэв. Энэ онд Оюу толгой төслөөс ногдол ашиг хүртэхээр болов. 
• Говьд 1500 ажлын байр бий болгох Бортээгийн ордын үйл ажиллагааг эхлүүлэв. 
• “Эрдэнэс Тавантолгой” ХК IPO гаргах ажил эхлэв. 
• ТӨК-иудын хувьцааны хэсгийг удирдуулах урилгыг олон улсын шилдэг 12 компанид хүргүүлэв. 
• Төрийн болон орон нутгийн өмчит компанийн засаглалын тухай хуулийн төслийг УИХ-д өргөн мэдүүлж батлуулав. Ашиггүй ажилладаг төрийн өмчит компани татан буулгах хууль эрх зүйн орчин бүрдэв. 
• Төрийн өмчит 14 компанийг татан буулгаж, 67 тэрбум төгрөг хэмнэв.
• 12153 татвар төлөгчийн дансыг нэг сарын хугацаанд нээснээр 91 тэрбум төгрөгийн өр төлбөр барагдуулав.
• Бизнесээ мэдэгдээд эхэлдэг болсноор 739 бизнес үүдээ нээв. 
• E-business 2.0 платформ нэвтэрч, 30 минутын дотор бизнесээ эхлүүлэх боломж бүрдэв.
• 321 зөвшөөрлийг гар утаснаасаа авдаг болов. 
• 2026 онд төлөвлөсөн 9376 хяналт шалгалтыг цуцлав.  
• 3.1 их наяд төгрөгийн  татвараас иргэн, ААН-үүдээ чөлөөлөх татварын хуулиудын нэмэлт, өөрчлөлтийн төслийг УИХ-д өргөн мэдүүлж, батлуулав.
• Үл хөдлөх хөрөнгө худалдахад ногдуулдаг 2 хувийн татварыг тэглэв. 
• Эдийн засгийн эрх чөлөөг бий болгох хуулийн төслийг УИХ-д өргөн мэдүүлж, батлуулав.
• Гадаадын 120 гаруй хөрөнгө оруулагч Монгол Улсад хүрэлцэн ирж, 545 сая ам.долларын гэрээ, санамж бичигт гарын үсэг зурав. 
• Олон жил шимтгэл төлсөн нь өндөр тэтгэвэр авах Нийгмийн даатгал, тэтгэврийн хуулийн шинэчлэлийг батлуулав.
• Эмч, багш нарыг цалингийн ойлгомжгүй байдлаас чөлөөлж, цалинг нь бодитой нэмэв. 
• Эрүүл мэндийн даатгалын сангийн өр төлбөрийг барагдуулав. 
• Сэргээгдэх эрчим хүчний салбарт анх удаа аукцион зарлаж, ирэх өвлийн оргил ачааллаас өмнө хувийн хэвшлийн компаниуд таван аймагт батарей хуримтлуур, нарны станц байгуулахаар ажлаа эхлэв. 
• Анхны “Ногоон өртөө” Булган аймагт үүдээ нээв.
• Хэрэглээний зээлийн ангиллаас ногоон зээлийг гаргаж, зээлийн хүүг багасгав.
• Нийслэлийн захиргааны хуучин байрыг Хүүхэд хөгжлийн ордон болгов.
• Хотхоны бага сургууль байгуулах ажил нийслэлийн “Оюуны Ундраа” сургуулиас эхлэв.