БНХАУ-ын Шанхай хотноо хуралдсан Дэлхийн хиймэл оюуны асуудлаарх Засгийн газрын дээд түвшний чуулганы үеэр 29 улс орон хамтран ажиллах хэлэлцээрт гарын үсэг зурж, Дэлхийн хиймэл оюун ухааны хамтын ажиллагааны байгууллага (WAICO)-ыг байгуулжээ.
Хятад улсын санаачилга, НҮБ-ын дэмжлэгтэй байгуулагдсан шинэ байгууллага WAICO нь хиймэл оюун ухааны салбарын олон улсын хамтын ажиллагаа болон засаглалыг ахиулах, хиймэл оюун ухааныг хүн төрөлхтний сайн сайхны төлөө, аюулгүй, шударга байлгах, хиймэл оюун ухааны эрүүл бөгөөд эмх цэгцтэй хөгжлийг дээшлүүлж, нийт хүн төрөлхтөнд үр өгөөжтэй байлгах зорилготой юм байна.
Энэхүү байгууллагад БНХАУ, Казахстан, ОХУ, Бразил, ӨАБНУ, Пакистан, Серби, Малайз, Индонез, Куба тэргүүтэй Ази, Төв Ази болон Африк, Өмнөд Америк, Латин Америк, Европын 29 орон гишүүнээр нэгджээ.
БНХАУ-ын дарга Ши Жиньпин хэлсэн үгэндээ, улс орнууд хиймэл оюун ухааныг сайн сайхны төлөө эерэгээр хөгжүүлэхийн тулд дараах зарчмуудыг баримтлах хэрэгтэй гэж онцолжээ. Үүнд:
- Нээлттэй, харилцан ашигтай хамтын ажиллагааг баримталж, инновацад суурилсан хөгжлийг дэмжих.
- Эрсдэлийн ойлголтыг бэхжүүлж, хиймэл оюун ухааны аюулгүй, хяналттай хөгжлийг хангах.
- Хүртээмжтэй байдлыг дэмжиж, соёл иргэншлүүд хооронд харилцан суралцах үйл явцыг ахиулах.
- Эв нэгдлийг эрхэмлэж, дэлхийн засаглалыг боловсронгуй болгох гэжээ.
Тэрбээр 2025 оны 10 дугаар сард болсон Ази, Номхон далайн эдийн засгийн хамтын ажиллагааны байгууллага /APEC/-ын хурлын үеэр энэ байгууллагыг байгуулах асуудлыг хөндөж байжээ.
0 сэтгэгдэл