НҮБ-ын цөлжилттэй тэмцэх тухай конвенцын талуудын 17-р бага хурлыг /СОР17/ Монгол Улс энэ оны наймдугаар сарын 17-28-нд Улаанбаатар хотноо зохион байгуулна. Энэхүү бага хуолын талаар хэн юу гэж хэлснийг энэ удаа багцлан хүргэж байна.

Монгол Улсын Ерөнхий сайд Н.Учрал:

-Бид зөвхөн хурал зохион байгуулаагүй. Бид бодит өвийг бүтээж байна. КOП17 нь цөлжилттэй тэмцэх дэлхийн шилдэг туршлагаас суралцахын зэрэгцээ Монголын туршлага, шийдлийг дэлхийтэй хуваалцах чухал боломж юм. Бага хурлын бодит амжилт нь зөвхөн хурлыг зохион байгуулснаар бус, Монгол Улс болон дэлхийд үлдээх урт хугацааны өв, бодит үр дүнгээр хэмжигдэнэ.

Монгол дахь НҮБ-ын Хүүхдийн сангийн Суурин төлөөлөгч БИАТЕ ДАСТЕЛ: 

-Энэ жилийн COP17 бол ирээдүй, итгэл найдвар, даван туулах чадавхын тухай юм. Монгол Улс болон түүний түншүүд, тэр дундаа НҮБ-ын Хүүхдийн Сан олон арван жилийн турш газар, усны эх үүсвэрийг сэргээж, хүүхэд, эмэгтэйчүүд, эрэгтэйчүүд, орон нутгийн иргэд болон улс орны ирээдүйн төлөө илүү сайн нөхцөлийг бүрдүүлэх чиглэлээр хэрэгжүүлсэн төсөл, хөтөлбөрүүдээ танилцуулна.

ОУХБ-ын БНХАУ, Монгол Улсыг хариуцсан товчооны Захирлын үүргийг түр орлон гүйцэтгэгч ДАЙ ШЯОЧУ: 

-СОР17 нь уур амьсгалын өөрчлөлт, газрын нөхөн сэргээлт, тогтвортой хөгжлийн чиглэлээр Засгийн газар, ажил олгогчид, ажилчид болон хөгжлийн түншүүдийн хамтын ажиллагааг бэхжүүлж, илүү олон, илүү чанартай ажлын байр бий болгох чухал боломж юм. 

Монголын Байгалийн Өв Сангийн Удирдах зөвлөлийн гишүүн Ө.АЗЖАРГАЛ:
-Монголын бэлчээр бол дэлхийн хамгийн том өвсөрхөг экосистемийн нэг тул бид үүнийг хамгаалах шаардлагатай хоосон газар бус, уур амьсгалын өөрчлөлтийн эсрэг стратегийн баялаг гэж үзэж байна. КОП17-ийн хүрээнд малчдын уламжлалт мэдлэгийг шинжлэх ухаан, тогтвортой санхүүжилттэй хослуулсан хамтын менежментийн шийдлүүдийг танилцуулна.

Талуудын 17-р бага хурал (COP17)-ын цахим хуудас: https://unccdcop17.org/

ЭХ БАЙГАЛИА СЭРГЭЭЕ

АМЬДРАЛЫГ ТЭТГЭЕ