Улаанбаатар хотноо 2026 оны 8 дугаар сарын 17-28-ны өдрүүдэд болох Цөлжилттэй тэмцэх тухай НҮБ-ын конвенцын Талуудын 17 дугаар бага хурал эхлэхэд 13 хоног үлдлээ. 

COP17 нь дэлхийн улс орнуудыг нэгтгэн "Эх байгалиа сэргээе, Итгэл найдвараа бадраая" уриан дор газрын доройтлыг бууруулах, цөлжилттэй тэмцэх, тогтвортой ирээдүйг хамтдаа бүтээх чухал индэр болох юм.

Үндэсний хорооны мэдээлснээр хурлын барилга байгууламжуудыг энэ 7 хоногоос хүлээлгэж өгөх ажээ.

Бүтээн байгуулалтын ажлын явц 90 гаруй хувьтай бөгөөд Цэнхэр бүсийн бүтээн байгуулалтыг бүрэн дуусгаж 8 дугаар сарын 05-06-нд НҮБ-д хүлээлгэн өгөхөөр төлөвлөсөн бол иргэд олон нийтэд нээлттэй Ногоон бүсийн хувьд бүтээн байгуулалтын ажлыг наймдугаар сарын 08-ны өдөр хүртэл бүрэн дүүргэхээр ажиллаж байгаа ажээ. 

Бямба гарагт болсон Үндэсний хорооны ээлжит хурлаас СОР17 хурлын үеэр сургууль цэцэрлэг, худалдааны төвүүд ямар хуваарьтай ажиллах, авто замын чиглэлүүдийг хэрхэн зохион байгуулах мэдээ мэдээллийг иргэд олон нийтэд тодорхой мэдээлэхийг  үүрэг болгосон байна.

Байгаль орчин, уур амьсгалын өөрчлөлтийн сайд, COP17 бага хурал зохион байгуулах Үндэсний хорооны дарга Ц.Сандаг-Очир:

-COP17 хурал бол нэг яам, Засгийн газрын ажил биш. Монгол Улсын нэр хүндийн ажил учир бүгд хичээж байна. Хамтран ажиллаж байгаа төр, хувийн хэвшлийнхэн болон нийт дэмжигч, оролцогчдод талархал илэрхийлье. 

Энэ хурлаар Монгол Улсад тулгамлаж буй цөлжилтийн асуудлаас гадна дэлхий нийтийн газрын доройтлын асуудлыг хэлэлцэж, шийдэл гаргана. Үр дүнд нь Монгол талд шаардлагатай төсөл хөтөлбөр, санхүүжилт татах, түүнээс цааш 10 жилийн хугацаанд хэрэгжих төсөл хөтөлбөрүүдийг татах зэрэг бодлогын алхам биеллээ олох болно. 

Одоогийн байдлаар хурлын бэлтгэл ажил 90 гаруй хувийн гүйцэтгэлтэй үргэлжилж байна.

Түүнчлэн бид COP17 бага хурлын хүрээнд гарах бодлогын баримт бичигт анхаарч ажиллаж байна. COP17 бага хуралд гадаад, дотоодын 10 мянга гаруй зочин, төлөөлөгч оролцохоор байна. 

“КОП17 хөрөнгө оруулалт, бүтээн байгуулалт” ОНӨААТҮГ-ын Ерөнхий инженер Ү.Энхтайван:

-Монгол Улс НҮБ-ын хүрээнд цөлжилт, газрын доройтол, гангийн асуудлаар хамгийн том Олон улсын хурлыг 8 дугаар сарын 17–28-ны өдрүүдэд хүлээн авах гэж байна. Энэ хурлын үеэр өдөрт 100 орчим хурал зэрэгцэн явагдах тул бид хурлын бүсийг нэгдсэн хотхон хэлбэрээр зохион байгуулж байна. 8 дугаар сарын 5 гэхэд барилга байгууламж, тохижилт, тоноглолын бэлэн байдлыг бүрэн хангахаар бэлтгэн ажиллаж байна.

ХХААХҮЯ-ны Мал аж ахуй, генетик нөөцийн бодлогын хэрэгжилтийг зохицуулах газрын дарга Л.Чой-Иш:

-СОР17 нь Монгол Улсын хувьд хөрөнгө оруулалт татах, оюуны болон олон талын хамтын ажиллагааг өргөжүүлэх чухал боломж юм. Green Lab-ийн хүрээнд хувийн хэвшлээс ирүүлсэн төслүүдээс 13 орчмыг хөгжүүлж, олон улсын хөрөнгө оруулагчдад танилцуулах бэлтгэлийг хангаж байна. Нийтдээ төр, хувийн хэвшил, мэргэжлийн холбоод, эрдэм шинжилгээний байгууллагуудаас 292 төсөл ирээд байна.

ЭХ БАЙГАЛИА СЭРГЭЭЕ

ИТГЭЛ НАЙДВАРАА БАДРААЯ