Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17) эхлэхэд гурав хоног үлдээд байна. Хурлыг зохион байгуулах бэлтгэл бүрэн хангагдсан хэмээн зохион байгуулагчдаас өнөөдөр мэдээллээ.

СОР17-г зохион байгуулах талбайн Цэнхэр бүсэд 350 орчим хурал, хэлэлцүүлэг өрнөх бөгөөд зөвхөн бүртгэлээ баталгаажуулж код, мандат авсан хүн орно. Харин Ногоон бүсэд 480 гаруй үйл ажиллагааг зохион байгуулах учир иргэд урьдчилан бүртгүүлэхээс гадна иргэний үнэмлэхийн QR кодыг уншуулж нэвтрэх боломжтой аж. Энд төрийн болон төрийн бус, иргэний нийгэм, олон нийтийн байгууллага, иргэд байгаль орчны чиглэлээрх 180 төслөө танилцуулж, 110 хэлэлцүүлэг хийж, 1500 орчим илтгэл тавих ба байгаль орчин болон бусад чиглэлээр бүтээсэн зургаан киноны нээлтийг хийхээр төлөвлөжээ.

Нийслэлийн Хот төлөвлөлт судалгааны институтын ерөнхий инженер Б.Лхагвасүрэн “Ногоон бүс олон нийтэд нээлттэй. Энэ нь газрын нөхөн сэргээлт, байгальд ээлтэй шийдэл, инновац бодит амьдралд хэрхэн хэрэгжиж байгааг иргэдэд таниулах орон зай юм. Ногоон бүсэд инновацын танилцуулга, соёл урлагийн тоглолт болж, 21 аймаг өдөр бүр танилцуулга хийж, туршлагаа хуваалцан, малчдын дуу хоолойг хүргэнэ. Монголын уламжлалт мал аж ахуй, нүүдлийн соёлыг түгээн дэлгэрүүлж, мал аж ахуйн мэдлэг, сайн туршлагаа, байгалийн болон соёлын биет бус өвийг танилцуулна” гэв.  

Ногоон бүсэд дөрвөн тайзнаас гадна нүүдэлчдийн нутаг хэсэг, хүлээн авах, соёлын өвийн гэрүүд, шинжлэх ухаан, үзэсгэлэн, олон нийт, мэдээллийн лангуунууд, илтгэл хэлэлцүүлэг болох танхимууд, хоол үйлчилгээний хэсэг, хэвлэл мэдээллийн төв бий. Энэ бүсэд болох үйл явдлыг вэб сайтаас гадна гар утсандаа СОР17 аппликейшн суулгаад өдөр өдрөөр нь хөтөлбөрийг нь харж мэдээлэл авах боломжтой.

СОР17-д 196 орны 6800 төлөөлөгч хүрэлцэн ирж, НҮБ-ын конвенцын хэрэгжилтийг дүгнэж, цаашдын бодлого, хамтын ажиллагаа, шийдвэрээ хэлэлцэн батлахаар байна.