“Улаанбаатар 2023” Зүүн Азийн залуучуудын наадмын нээлтийн ёслолын үйл ажиллагаа өнөөдөр 20.23 цагаас Төв Цэнгэлдэх хүрээлэнд эхэлнэ.

Монгол Улс тус наадмыг энэ сарын 23 хүртэл зохион байгуулах бэлтгэлээ хангаад байна. Наадмын нээлтийн үйл ажиллагааны урьдчилсан үзлэг, сургуулилт болж, зохион байгуулагчид олон гэнэтийн бэлэг бэлтгээд байгаа аж.

“Улаанбаатар 2023” Зүүн Азийн залуучуудын наадмын нээлт болон тэмцээний тасалбарыг TICKET.MN веб сайтаас захиалах, мөн борлуулалтын цэгүүдээс худалдан авах боломжтой.

Зүүн Азийн үндэсний олимпын 9 хороо байдгаас 7 нь наадамд оролцоно. Тодруулбал, 808 тамирчин, 226 дасгалжуулагч, Азийн спортын холбоодоос томилогдсон техникийн болон шүүгчийн 123 төлөөлөгч, дотоодын 191 шүүгч, техникийн ажилтан зэрэг 1600 гаруй хүн оролцох юм. Мөн сайн дурын 1000 гаруй хүн ажиллах юм. Нээлтэд 400 гаруй уран бүтээлч оролцох бөгөөд  наадмыг боксын тэмцээнээр эхлүүлнэ. 

Наадмын бэлгэдэл болох Хаки нь хангарьд, Инга нь галбингаа шувуу юм. Жендерийн эрх тэгш байдлыг хүндэтгэн энэ хоёр шувууг "Улаанбаатар 2023" Зүүн Азийн Залуучуудын Наадмын бэлгэдэл болгон сонгожээ.