Манай улс 2021 онд 721ш, 91230кг, 2022 онд 296ш 72567.72кг, давхардсан тоогоор 296 нэр төрлийн электрон тамхи импортолжээ.

Хятадын эм зүйч Хон Лик электрон тамхийг 2003-2008 онд зохион бүтээсэн. Энэ нь зайны бүрэлдэхүүн хэсгээс гадна шингэний уусмал бүхий зэвэрдэггүй гангаар хийсэн халагч хэсгүүдээс бүрддэг. Төхөөрөмжийг ажиллуулах үед зай нь халагч хэсгийг 318 С хүртэл халааснаар шингэнийг ууршуулж, хэрэглэгчийн амьсгалах манан хэлбэрээр ялгаруулдаг байна. Nicotine нь байгалийн гаралтай алкалоид бөгөөд маш хүчтэй донтуулагч бодис. Янжуур тамхинд агуулагдах никотины зөвшөөрөгдөх дээд хэмжээ нь MNS 5024:2013 стандартын дагуу 1,3 мг байдаг (Жишээ нь: ESSE Change 0.3мг, Parliament 0,8мг). Харин зарим электрон тамхинд энэ үзүүлэлт 25-100 мг гэдгийг Гаалийн ерөнхий газрын Гаалийн төв лабораторийн шинжээч, Гаалийн улсын ахлах байцаагч Б.Мөнхцацрал байгууллагынхаа цахим хуудсаар тайлбарлажээ.

Электрон тамхины үндсэн найрлага Glycerol, Propylene glycol нь чихэрлэг амттай, өнгөгүй шингэн. Хүнс, эм, entertainment үйлдвэрлэл гэх мэтээр өргөн хэрэглээтэй. Гэвч эдгээр бодис нь 215 -с дээш хэмд халахаараа хүний биед хавдар үүсгэдэг Formaldehyde, Acetaldehyde, Acrolein болон задардаг байна.

Дэлхийн тамхины хяналтын төв байгууллагаас 2022 онд гаргасан судалгаагаар 37 улс электрон тамхи худалдаалахыг хориглож, Австри, Бельги, Канад, Ирланд, Итали, БНСУ, Норвеги зэрэг 73 улс худалдаалахыг зөвшөөрсөн ч борлуулах газар, нас, цаг зэргийг журамлажээ.

Монгол Улсад “Тамхины хяналтын тухай” хуулийн шинэчилсэн найруулга 2005 онд батлагдан 2012, 2015, 2019, 2022, 2023 онд тус тус нэмэлт өөрчлөлт оруулсан ч электрон тамхины тухай хараахан тусгаагүй аж.