Байгаль орчин, уур амьсгалын өөрчлөлтийн яам болон “Өнө мөнхийн Монгол” хөтөлбөрөөс улсын тусгай хамгаалалттай газар нутаг /УТХГН/-аас байгалийн аялал жуулчлал, ой, мал аж ахуй, газар тариалан, ундны ус болон уул уурхай зэрэг зургаан салбарт үзүүлэх эдийн засгийн үнэ цэнийг тооцсон судалгааны үндсэн үр дүн болон бодлогын зөвлөмжийг танилцууллаа. 

Судалгааны үр дүнд тулгуурлан тусгай хамгаалалттай газар нутгийн байгаль хамгааллын өгөөжийг эдийн засгийн бодит үнэ цэнээр тодорхойлох, цаашдын бодлого, хөрөнгө оруулалтын тэргүүлэх чиглэлийг тогтоох боломж бүрдэж байна.

Энэ үеэр Байгаль орчин, уур амьсгалын өөрчлөлтийн яамны Тусгай хамгаалалттай газар нутгийн бодлогын газрын дарга Ц.Уранчимэг: “Тусгай хамгаалалттай газар нутгийг зөвхөн хамгаалалтын бүс бус, усны нөөц, хүнс, аялал жуулчлал, мал аж ахуй, экосистемийн үйлчилгээгээр дамжуулан эдийн засгийн үнэ цэн бүтээдэг үндэсний хэмжээний хөрөнгө хэмээн үнэлэх нь байгаль хамгааллын бодлогыг эдийн засгийн шийдвэртэй уялдуулахад чухал ач холбогдолтой”-г онцлов. 

Байгаль хамгааллын ойлголт нь тусгай хамгаалалттай газар нутгийн хамгааллын асуудалтай нягт холбоотой.  Монгол Улсын тусгай хамгаалалттай газар нутгийн хамгаалалтын менежментийг бэхжүүлэх, биологийн олон янз байдлыг хамгаалах, үндэсний хэмжээний байгаль хамгааллын зорилтуудыг бодит хэрэгжилтэд хүргэхэд чухал хувь энэ судалгаа нь чухал хувь нэмэр оруулж байгаа юм. 

Тус арга хэмжээнд Дэ Нэйче Консерванси ОУБ-ын Байгаль хамгааллын захирал Ю.Баяржаргал, НҮБ-ын Хөгжлийн хөтөлбөрийн ахлах эдийн засагч М.Флорес, судалгааны багийн ахлагч Г.Ганзориг, олон нийттэй харилцах ахлах мэргэжилтэн Блинни Финеган нар оролцож, судалгааны үр дүн болон цаашдын боломжийн талаар танилцуулсан байна.