Ерөнхий сайд Н.Учрал тус мэдэгдэлдээ: 

-Монголын Ард түмэндээ дахин сайхан мэдээ дуулгая. 17 жилийн дараа Оюутолгойн хувь нийлүүлэгчдийн гэрээнд Монголын талын өгөөжийг нэмэгдүүлэх өөрчлөлт орлоо. Ингэснээр  “Оюу толгой” ХХК-ийн менежментийн зардал 8.4 тэрбум ам.доллар буюу 30 орчим их наяд төгрөгөөр буурч, Монголын талын өгөөж уурхайн ашиглалтын нийт хугацаанд 4 орчим тэрбум ам.доллар буюу 13 их наяд төгрөгөөр нэмэгдэх нөхцөл бүрдэж байна. Мөн 2027 оноос монголчууд Оюу толгой төслөөс ногдол ашиг авахаар боллоо гэсэн юм.

Рио Тинто СЕО Саймон Тротт, хоёр тал ойлголцож байгаад баяртай байгаагаа илэрхийлэв. Түүний үгэнд нэг ч тоо дурдагдсангүй.

Засгийн газраас ч Ерөнхий сайд Н.Учрал, Рио Тинто СЕО Саймон Тротт нарын шууд мэдэглээс өөр албан ёсны мэдээллийг тараагаагүй байна.

"Оюу толгой" ХХК:

Монгол Улсын Засгийн газар болон Рио Тинто компани Оюу толгойн хувь нийлүүлэгчдийн асуудлаарх хэлэлцээний хүрээнд менежментийн үйлчилгээний зардлыг бууруулах, хувь нийлүүлэгчдийн зээлийн хүүг бууруулах талаар тохиролцоонд хүрсэн билээ. Өнөөдөр талууд эдгээр тохиролцоог албажуулж, холбогдох гэрээ, баримт бичгүүд дээр гарын үсэг зурсан бөгөөд Оюу толгойн ногдол ашгийг 2027 онд хувь нийлүүлэгчдэд хуваарилахад хамтран ажиллахаар баталгаажууллаа.

“Оюу толгой” компанийн Гүйцэтгэх захирал С.Мөнхсүх: “Энэ ахиц дэвшил нь нэг талын бус, хамтын хүчин чармайлт.Харилцан итгэлцэл, нээлттэй яриа хэлэлцээ, шийдэлд төвлөрсөн хамтын ажиллагааны үр дүнд өнөөдрийн энэ алхам бодит ажил болж чадлаа” хэмээн онцоллоо.

Б.Солонго: Косметик засвар хийгээд бидэнд ирэх үр өгөөж нэмэгдэхгүй, дорвитой үр дүн гарахгүй

Харин Хууль зүй, дотоод хэргийн дэд сайд байх үеэс Л.Оюун-Эрдэнийн Засгийн газрын үед Рио Тинто-той хийх хэлэлцээрт Монголын талын гол зохицуулагчаар ажиллаж байсан, хожмоо Засгийн газрын тэргүүн дэд даргаар ажиллаж байсан Б.Солонго "Манай Засгийн газар хүндээ хөнгөнөөс өгчээ. Ингээд байхаар Рио Тинтод “дээрэлхүүлээд” байхаас яахав. Бушуу туулай борвиндоо баастай гэдэг. Яриа хэлэлцээний үр дүн дорвитой биш болох нь хэдхэн сарын дотор тодорхой болно. Оюутолгойн зэс, алтны орд ямар том нөөц, баялаг, ямар том боломж болохыг бид дууссан хойно нь ойлгож харамсахгүйн тулд суурь гэрээнүүдийг цаг алдалгүй шинэчлэх ёстой юм. Ирээдүй хойчийнхоо төлөө бид үүнийг хийх ёстой юм. Бидний үүрэг юм. Косметик засвар хийгээд бидэнд ирэх үр өгөөж нэмэгдэхгүй, дорвитой үр дүн гарахгүй билээ" хэмээн нийгмийн сүлжээнд байр сууриа илэрхийллээ.

Мөн Монголын Засгийн газрыг төлөөлөн Оюу толгой ХХК-ийн ТУЗ-ийн гишүүнээр ажиллаж асан Э.Баясгалан Ерөнхий сайд Н.Учралын хамт товч мэдэгдэл хийсэн Саймон Троттын хэлсэн үгийг үгчилж биш утгачилж ойлгох нь:

1. Бүхэл бүтэн тусгаар Монгол улсын ерөнхий сайдыг, кабинетийн сайд нартай нь баасан гарагийн үдэш, ажлын бус цаг, шөнө дөлөөр буулгаж авч би чадлаа

2. Өчүүхэн төдий хэлэлцээрийн үр дүнг маш том амжилт хэмээн молиго үмхүүлж, Рио Тинтогийн байр суурь, эрх ашгийг хамгаалж би чадлаа

3. 2027 онд ногдол ашиг тараах талаар хамтарч ажиллана гэж хэлээд Монголчуудад хэзээ, хэдий хэмжээний ногдол ашиг өгөх талаар жинхэнээсээ ямар ч гэрээ, эрх зүйн хариуцлага хүлээлгүй, Рио Тинтог эрсдэлээс хамгаалж би чадлаа

4. Эцэст нь 17 жил Монголын ард иргэд болон Монголын улстөрчдийг төөрөгдүүлж, хуурч, доромжилж Рио Тинто чадсаар ирсэн билээ. Чаддаг юманд арга байхгүй л дээ гэнээ... хэмээжээ.