МАН дахь улс төрийн зөрчилдөөнөөс үүдэлтэй парламентын үйл ажиллагаа дахин доголдоход хүрээд байна. УИХ-ын дарга Н.Учрал Даваа гарагт өөрийн хүсэлтээр УИХ-ын даргын үүрэгт ажлаас чөлөөлөгдөж, улмаар Ерөнхий сайдаар томилогдсон. Ингэснээр УИХ даргагүй болсон. Тэгвэл УИХ-ын дарга хэн байвал зохимжтой талаар УИХ дахь АН-ын бүлэг байр сууриа илэрхийллээ. 

УИХ-ын гишүүн, УИХ дахь Ардчилсан Намын бүлгийн дэд дарга Х.Тэмүүжин өнөөдөр болсон АН-ын 4/11 мэдээллийн цагт оролцож сэтгүүлчдэд мэдээлэл өгөв. Энэ үеэр тэрбээр:

-УИХ буюу парламентын “толгой” дээр нам нь  гардаг, социализмын үе өнгөрсөн. Одоо бид олон намын тогтолцоотой болсон учраас намууд маргаан, мэтгэлцээнийг дотооддоо шийддэг болох ёстой. Намынхаа хурлыг парламентаас гадуур хийгээд парламентын асуудлыг шийддэг Үндсэн хуулийн бус арга замаас одоо салах цаг нь болсон. 

Дахин сануулахад УИХ-ын дарга бол олон намын төлөөлөл бүхий парламентын үйл ажиллагааг хэвийн явуулах, парламентын дархлаа, ардчиллыг  хамгаалах гол хэрэгсэл нь болдог. Тиймээс УИХ-ын дарга төвийг сахиж, өөрийнхөө дэвшиж гарсан намын олонхын байр суурийг хамгаалдаггүй, намынхаа дотоод өрсөлдөөнд оролцдоггүй байх ёстой гэлээ.