УИХ-ын чуулганы нэгдсэн хуралдаанаар өнөөдөр Улсын Их Хурлын даргыг сонгох асуудлыг хэлэлцлээ. Монгол Улсын Их Хурлын даргаар С.Бямбацогт гишүүнийг сонгуулахаар Улсын Их Хурал дахь МАН-ын бүлгээс нэр дэвшүүлснийг Улсын Их Хурал дахь МАН-ын бүлгийн дарга Ж.Батжаргал танилцуулав. 

Тэрбээр, Монгол Улсын Үндсэн хуулийн Хориндөрөв дүгээр зүйлийн 24.1, Монгол Улсын Их Хурлын тухай хуулийн 10 дугаар зүйлийн 10.1, 11 дүгээр зүйлийн 11.1, Монгол Улсын Их Хурлын чуулганы хуралдааны дэгийн тухай хуулийн 19 дүгээр зүйлийн 19.1 дэх хэсгийг тус тус үндэслэн Улсын Их Хурал дахь МАН-ын бүлгийн 2026 оны 4 дүгээр сарын 02-ны өдрийн хуралдааны шийдвэрийн дагуу Улсын Их Хурлын гишүүн Сандагийн Бямбацогтыг Улсын Их Хурлын даргад нэр дэвшүүлж байна гэв.

Мөн С.Бямбацогт иргэд, сонгогчдын итгэлийг хүлээж Улсын Их Хурлын гишүүнээр тасралтгүй таван удаа сонгогдон ажиллаж, 50 гаруй хуулийн төслийг санаачилж, ажлын хэсгүүдийг ахлан ажилласан.  2019 оны Үндсэн хуулийн нэмэлт, өөрчлөлтийн эрх баригчдын нэг, Монгол Улсын урт хугацааны хөгжлийн бодлого тодорхойлогч, Улсын Их Хурлын хяналт шалгалтын тухай анхдагч хуулийн төслийг санаачлагч, эрх зүйн олон шинэтгэлийг амжилттай хэрэгжүүлсэн, мэргэшсэн парламентч юм.  Иймд Улсын Их Хурал дахь МАН-ын бүлгээс Улсын Их Хурлын гишүүн Сандагийн Бямбацогтыг хууль тогтоох байгууллагад ажилласан байдал, боловсрол, мэдлэг туршлагыг харгалзан Улсын Их Хурлын даргад нэр дэвшүүлж байгааг онцоллоо.

Энэ асуудалтай холбогдуулан Улсын Их Хурал дахь АН-ын бүлгийн дарга О.Цогтгэрэл үг хэлэв. Тэрбээр АН-ын бүлгээс тавьж байгаа үндсэн шаардлагын хүрээнд хуулийн төсөл өргөн барьсан. Хуулийн төслийн үзэл баримтлалд зөвхөн ганц энэ заалт биш, хэд хэдэн чухал зүйл, заалт бий. Энэ хүрээнд Улсын Их Хурал дахь АН-ын бүлэг ярилцаж, хэлэлцэх шаардлагатай байна гээд уг асуудлаар ажлын гурав хоногийн завсарлага авахыг хүссэн юм.

Харин хуралдаан даргалагч, Улсын Их Хурлын дэд дарга Ж.Бат-Эрдэнэ Улсын Их Хурал дахь АН-ын бүлэгт  нэг хоногийн завсарлага өгөв.