УИХ-ын шинэ даргыг сонгох үйл явц парламентын түвшинд өрнөж байна. УИХ дахь МАН-ын бүлэг С.Бямбацогтыг УИХ-ын даргад нэр дэвшүүлсэн бол УИХ дахь АН-ын бүлэг УИХ-ын дарга нам бус байх тухай хуулийг дэмжиж, хэлэлцүүлэг эхлүүлсэн тохиолдолд чуулганы хуралдаанд оролцохоо илэрхийллээ.
Энэ дагуу УИХ-ын Төрийн байгуулалтын байнгын хороо өнөөдөр хуралдаж, УИХ-ын гишүүн Х.Тэмүүжин нарын 17 гишүүн санаачилсан УИХ-ын тухай хуульд өөрчлөлт оруулах тухай болон хамт өргөн мэдүүлсэн хуулийн төслүүдийн хэлэлцэх эсэхийг хийж, байнгын хороодын гишүүдийн 82.6 хувь нь үзэл баримтлалын хувьд дэмжлээ.
Байнгын хорооны гишүүд хуулийн төслийн хүрээнд санал хэлж, асуулт асуув. Тухайлбал, хуулийн төслийг үзэл баримтлалын хүрээнд дэмжээд олон талаас нь харж, ажлын хэсэгт намуудын төлөөллийг багтаах хэрэгтэй. Цаашлаад улс төрийн хатуу гишүүнчлэлтэй улс оронд зохицох эсэхийг судлах шаардлагатай гэв. Парламентын засаглалтай улс орнуудад энэ зохицуулалтыг хэрэглэдэг нь цөөн гэдгийг гишүүд хэллээ.
Хуулийн төслийн 11.4-т, УИХ-ын дарга нь нам улс төрөөс ангид бие даасан, төвийг сахисан байр сууринаас бүрэн эрхээ хэрэгжүүлнэ. УИХ-ын дарга Олон Улсын Парламентын Холбоо хоорондын тохиролцсон албан тушаалаас өөр ажил, албан тушаал давхар эрхлэхийг хориглоно гэж тусгажээ.
Мөн хуулийн төслийн 11.5-д, УИХ-ын дарга бүрэн эрхийнхээ хугацаанд намаасаа түдгэлзэнэ. УИХ-ын дарга намаасаа түдгэлзсэн нь түүний Улсын Их Хурлын дараагийн ээлжит болон ээлжит бус сонгуульд намаасаа нэр дэвших эрхийг хязгаарлахгүй гэж тусгажээ.
Төслийг өнөөдөртөө багтааж УИХ-ын чуулганы хуралдаанаар хэлэлцэх эсэхийг нь шийдэх төлөвтэй байна. Энэхүү хууль батлагдвал шинээр сонгогдох УИХ-ын дарга анхны намаасаа түдгэлзсэн дарга болох юм.
Монгол Улсын Үндсэн хууль болон Улсын Их Хурлын тухай хуульд УИХ-ын даргад нэр дэвшигчийг чуулганд оролцсон гишүүдийн олонх нь дэмжвэл сонгогдсонд тооцож тогтоол батладаг. Хэрвээ нэр дэвшигч олонхын дэмжлэг авч чадахгүй бол УИХ дахь хамгийн олон суудалтай намын төлөөллөөс өөр нэр дэвшигчийг санал болгох юм
0 сэтгэгдэл