УИХ-ын чуулганы өнөөдрийн нэгдсэн хуралдаанаар Ерөнхийлөгчийн санаачилсан Монгол Улсын Их хурлын тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийн үзэл баримтлалыг дэмжих эсэхээр санал хураах байсан ч уг асуудлаар УИХ дахь Ардчилсан намын бүлгээс нэг хоногийн завсарлага авлаа.

УИХ дахь Ардчилсан намын бүлгийн дэд дарга Х.Тэмүүжин “Ардчилсан намын Үндэсний бодлогын хорооны хурал дуусаагүй, өнөөдөр ч үргэлжилж байгаа тул гишүүдийн ирц хангалттай биш байна.  Энэ хууль нь парламентыг хариуцлагатай болгохтой холбоотой, нөгөө талаасаа парламентын ардчиллыг эмзэг байдалд оруулж болзошгүй гэдэг шүүмж өрнөж байгаа.  УИХ-ын гишүүдийн ирцийг сайжруулж, байр сууриараа саналаа өгөх боломжийг хангах үүднээс Ардчилсан намын бүлэг нэг хоногийн хугацаатай завсарлага хүсэж байна” гэсэн юм. Тиймээс УИХ-ын дарга АН-ын бүлэгт завсарлага өглөө.  

АН-ын бүлгийн завсарлага ирэх долоо хоногийн пүрэв гарагт буюу дөрөвдүгээр сарын 16-нд дуусаж, иргэд, олон нийтийн анхаарлын төвд байгаа дээрх хуулийн төслийн хэлэлцэх эсэхийг парламентаар шийдэх төлөвтэй байна. УИХ-бн гишүүдийн олонх нь уг хуулийн төслийг дэмжвэл цаашид ажлын хэсэг байгуулж боловсруулалтыг сайжруулан үргэлжлүүлж хэлэлцээд батлах ёстой. Харин чуулганд оролцсон гишүүдийн олонх нь дэмжээгүй тохиолдолд Ерөнхийлөгчийн санаачилсан төслийг дахин хэлэлцэхгүй юм.