Унгарын парламентын сонгуульд ялснаа зарлаж сөрөг хүчний “Тиса” намын дарга, 45 настай Петер Мажар Будапешт хотноо олон арван мянган дэмжигчдийнхээ өмнө үг хэллээ.

Сонгуулийн комиссын мэдээлснээр, саналын 98 хувийг тоолсны дараах байдлаар баруун төвийн үзэл баримтлалтай “Тиса” нам парламентын 199 суудлаас 138-ыг нь авч, Үндсэн хуулийн олонх төлөвтэй байна.  Намын удирдагч П.Мажар хэлэхдээ “бид Унгарыг чөлөөллөө, бид эх орноо эргүүлэн авчирлаа” гээд бүх унгарчуудын, тэдний дотор гадаадад амьдарч буй унгарчуудын эрх ашгийг хамгаална гэдгээ амлалаа. 

Түүнчлэн 2010 оноос хойш засгийн эрхийг барьж байсан Унгарын Ерөнхий сайд Виктор Орбан сонгуульд ялагдснаа хүлээн зөвшөөрчээ.

Унгарын дараагийн Ерөнхий сайдаар томилогдох нь тодорхой болсон Петер Мажар нь өмгөөлөгч мэргэжилтэй, өмнө нь Орбаны удирдсан “Фидес” намын залуучуудын жигүүрийн гишүүн байсан бөгөөд 2024 оны хоёрдугаар сард улс төрийн тавцанд гарч иржээ. Иус намынхан өнгөрсөн хоёрдугаар сард 240 хуудас бүхий сонгуулийн мөрийн хөтөлбөрөө нүсэр арга хэмжээний үеэр бус харин YouTube сувгаар олон нийтэд танилцуулсан байна. Уг хөтөлбөрт В.Орбаны бий болгосон авлигын тогтолцоог эвдэж, хууль дээдлэх ёс, ардчиллыг сэргээхээс гадна Унгар улсыг Европын Холбоо, НАТО-гийн найдвартай холбоотон болгох, эрүүл мэнд, боловсролын салбарт шинэчлэл хийх, ядуурлыг бууруулах зэрэг асуудлуудыг тусгажээ.  

Үндэсний сонгуулийн товчооноос мэдээлснээр, нийт саналын 98 хувийг тоолсны дараах байдлаар “Тиса” нам парламентад 138 суудал, В.Орбаны “Фидес” нам ба Христийн ардчилсан ардын намын эвсэл 54 суудал, хэт барууны “Бидний эх орон” хөдөлгөөн 7 суудал авах төлөвтэй байна.