Нийслэлийн Засаг дарга бөгөөд Улаанбаатар хотын Захирагч Х.Нямбаатар СОР17 бага хурлын бэлтгэл ажлыг хангах хүрээнд энэ өдрүүдэд манай улсад ажиллаж буй Цөлжилттэй тэмцэх тухай НҮБ-ын конвенцын гүйцэтгэх нарийн бичгийн дарга Ясмин Фуад тэргүүтэй төлөөлөгчидтэй өчигдөр уулзлаа.

Уулзалтын үеэр хотын дарга Х.Нямбаатар НҮБ-ын Конвенцын Талуудын 17 дугаар Бага хурлыг манай улсад зохион байгуулах гэж байгаа нь туйлын ач холбогдолтой гэж үзэж байна хэмээгээд Улаанбаатар хотын хувьд зөвхөн зохион байгуулагч хот байхаас илүү идэвхтэй оролцоог ханган, дэлхийн хотуудын өмнө тулгамдаж буй цөлжилт, газрын доройтол, усны хомсдол, тоосжилт, хөрсний эвдрэл, шилжилт хөдөлгөөн, мөн хот, хөдөөгийн уялдааг шинээр тодорхойлох шаардлагад хотын удирдлагын түвшинд хамтын манлайллыг бий болгож, олон улсын тавцанд таниулах зорилгоор Монгол Улсад зохион байгуулагдах COP17 бага хурлын үеэр “Хотын дарга нарын чуулга уулзалт”-ыг зохион байгуулахаар санаачлан ажиллаж байгаа гэдгээ хэлэв.

Мөн тэрбээр “Хотын дарга нарын чуулга уулзалт”-ыг COP17 бага хурлын хөх бүсийн албан ёсны хөтөлбөрт оруулж өгсөнд талархал илэрхийллээ.

COP17 бага хурлын хүрээнд “Хотын дарга нарын чуулга уулзалт”-ыг 2026 оны наймдугаар сарын 21-ний өдөр зохион байгуулахаар төлөвлөж, Улаанбаатар хотноо нийт 200-300 хотын дарга нарыг урихаар бэлтгэл ажлыг эхлүүлээд байна. 

Уулзалтаар талууд цаашид хамтын ажиллагаагаа улам гүнзгийрүүлж, Цөлжилттэй тэмцэх тухай НҮБ-ын конвенцын зорилтуудыг хэрэгжүүлэхэд хотуудын оролцоог нэмэгдүүлэх, бодит үр дүнд хүрсэн, тогтвортой түншлэлийг бий болгоход нягт хамтран ажиллах талаар санал солилцов.

Эх сурвалж: НЗДТГ