Улс орон даяар хэмнэлтийн горимд шилжиж, тэвчиж болох зардал бүхнийг хэмнэж, бүсээ чангалж ажиллаж, амьдрахыг уриалж байна. Энэ ч аргагүй юм. Гэхдээ юуг яаж тайрах вэ? гэдгээ сайн бодож хайчлах хэрэгтэй л дээ. 

Өнөөдөр болсон Замын даргын зөвлөгөөн дээр Улаанбаатар-Сайншанд чиглэлийн зорчигчийн галт тэргүүдийг зогсоох шийдвэрийг яамнаас өглөө гэж хэлнэ билээ.

Би дахиад тэмдэглэе. Яг энэ цаг үед дэлхий ертөнц дээр энэ тэнд дайны гал дүрэлзэж байгаа нөхцөлд урьдынх шиг палан цулан юм аа хумина гэдэг нь туйлын зөв. Гэхдээ юуг, яаж гэдэг асуултын тэмдэг тавина. Сайншандын чиглэлийн зорчигчийн галт тэргүүд чинь миний багцаалсан баримжаагаар хамгийн дүүргэлт сайтай галт тэрэг гэж үзнэ. Ер нь зорчигч тээвэр чинь өөрөө АРД ТҮМНИЙ тээвэр шүү дээ. Корона тахлын үеэр суудлын галт тэргүүдийг нэг хэсэг хугацаанд зогсоосон. Эргээд сэргээхэд хөдөөгийн зөрлөг, замын хэсгүүд дээр суудал ирэхэд “наадам” болж байгаа юм шиг л морьтой, явган цуглацгааж, төмөр замчид ч жагсаалын цэрэг шиг яв тав гоё байсан гэцгээдэг. Цөмөөрөө хэдэн “ногоон” вагоноо саначихгүй юу. Би дээр Ард түмний тээвэр гэж хэлсэн. Энэ галт тэргээр чинь хөдөөгийн малчид, аймаг сумын албан хаагчид, арилжаа наймаа хийгчид, оюутан залуус, гадаад дотоодын иргэд, төмөр замчид зорчиж алба, амьны ажлаа залгуулж байгаа шүү дээ.

Нөгөө талаар манай суудлын галт тэрэгний зурмаг чинь өвөл, зуны хуваариараа олон улсад зарлагддаг шүү дээ. Үүнийг үндэслэж аялал жуулчлалын байгууллагууд цаг нараа тооцож, ажил төрлөө зохион байгуулдаг. Хаа байгаа Японы аялал жуулчлалын байгууллагын ханан дээр манай зорчигчийн галт тэрэгний цагийн хуваарь, МИАТ-ын нислэгийн хуваарь зэрэг нь хадаатай байдаг юм билээ. Мөн манай төмөр зам гишүүнээр нь явдаг Варшав дахь Олон улсын төмөр замуудын хамтын ажиллагааны байгууллага (ОУТЗХАБ/ОСЖД)-ын Хоёрдугаар комиссын хуралдаанаас гишүүн төмөр замуудын зорчигч тээврийн галт тэрэгний (олон улсын) цагийн хуваарийг баталдаг.

Иймд суудлын галт тэргийг цуцлах тухай шийдвэрээ холбогдох газрууд (Яам, тамга) эргэж харвал илүү зохистой гэж ахмад төмөр замчин хүний хувьд зөвлөж байна.