Нийслэлийн Иргэдийн Төлөөлөгчдийн Хурал өнөөдөр ээлжит бусаар хуралдаж, дарга А.Баярыг төлөөлөгчдийн дийлэнх олонхын саналаар огцруулжээ.

Харин НИТХ-ын дарга А.Баяр энэхүү хуралд оролцоогүй бөгөөд "хурлыг хууль бус" хэмээн мэдэгджээ. Тэрбээр өтовлогдсон байсан НИТХ-ыг тодорхойгүй хугацаагаар хойшлуулах захирамж гаргаад хуралдаа ирээгүй байна. Тиймээс Нийслэлийн Засаг дарга Х.Нямбаатараар удирдуулсан тал олонхоороо төлөөлөгч Ж.Батбаясгалангаар даргалуулж хурлыг хуралдуулжээ.

МАН-ын бүлгээс дараагийн НИТХ-ын даргад Ерөнхийлөгчийн байгаль орчин, ногоон хөгжлийн зөвлөхөөр саяхан томилогдсон, НИТХ дахь МАН-ын бүлгийн дарга Д.Ихбаярыг нэр дэвшүүлжээ. Тэрбээр НИТХ-ын даргад нэр дэвшсэн тул бүлгийн даргаасаа чөлөөлөгдөх хүсэлтээ гаргаж, түүний оронд НИТХ дахь МАН-ын бүлгийн даргад төлөөлөгч Ж.Сандагсүрэнг нэр дэвшүүлэн сонгожээ. Шинээр сонгогдсон МАН-ын бүлгийн дарга тус намын бүлэг НИТХ-аас завсарлага хүсэж байгааг хэлж, хурал завсарлаад байна. Учир нь НИТХ-ын даргад нэр дэвшүүлсэн Д.Ихбаярын асуудлыг МАН-ын Удирдах зөвлөлийн хуралд танилцуулахаар болжээ.

Ийнхүү эрх баригч нам МАН-ын удирлагад үүссэн хямрал нийслэл рүү "халдварлаж", 2024 онд болсон орон нутгийн сонгуулиар нийт 45 төлөөлөгчийн 40-ийг үнэмлэхүйгээр бүрдүүлсэн МАН-ын илт давамгайлал бүхий НИТХ-д бас нэгэн "дажин" эхэллээ. Хоёр тал өнөөдрийн хуралдааныг хууль ёсны, хууль бус хэмээн маргалдаж байна.

Харин НИТХ-ын Ажлын албаны дарга М.Халтар "НИТХ-ын дарга А.Баярыг огцруулсан хуралдаан хуулийн дагуу явсан. Төлөөлөгчдийн 1/3-ээс дээш буюу 30 гаруй төлөөлөгч хуралдуулах санаачилга гаргасан. Хурлас гаргасан шийдвэр хүчин төгөлдөр" хэмээн мэдэгджээ.

Ташрамд дурдахад, хуулийн байгууллагаас өнгөрсөн баасан гараг болон амралтын өдрүүдэд Нийслэлийн Засаг даргын нэгдүгээр орлогч Т.Даваадалай, НИТХ-ын төлөөлөгч Т.Сэргэлэнбаатар нарын орон гэрт нэгжлэг хийж, тэднийг саатуулсан ч өнөөдөр тэд шүүхийн шийдвэрээр суллагдсан байна. Уг хэргийг "Туулын хурдын зам" төсөлтэй холбоотойгоор хуулийн байгууллагаас шалгаж буйтай холбоотой хэмээж байна.