Монголын бурханы шашны тэргүүн, Оройн дээд Очирдара Х Богд Жэвзүндамба хутагт Данзанжамбалчойживанчүг гэгээнтний мэлмий гийсэн бэлгэт сайн өдөр хаврын адаг сарын шинийн 15-нд буюу тавдугаар сарын 1-ний өдөр тохиож байна.
Өдгөө 11 насны төрсөн өдөр нь тохиож буй тэрбээр 2023 онд Дээрхийн гэгээнтэн далай ламаас батламжлагдаж, Монголын бурханы шашны тэргүүн, Х Богдоор өргөмжлөгдөн ном, эрдэмд шамдаж байна.
Х Богд нь монгол аав, ээжээс төрсөн, удам гарлын хувьд эцэг эхийн тал нь хуучнаар Түшээт ханыхан, өнөөгийн Булган, Өмнөговь аймгийнх юм.
Төрийн соёрхолт түүхч, Богд судлаач О.Батсайхан:
-Дөрвөн зуу шахам жилийн өмнөөс Монголын Богд Өндөр гэгээн Занабазараас хойш удаа дараалан заларч байсан Богд Жавзандамба хутагтууд Монголын шашин, үндэсний уламжлал, соёлд үлэмж их ач тус үзүүлж ирсэн юм. Үүний нэгэн адилаар Богд Жавзандамба хутагтын Х дүрээр монгол орондоо монгол хүн тодорсон нь монголчуудын оюун санааны хөгжилд чухал хувь нэмэр болж, үндэсний үнэт зүйлсээ дээдэлсэн монголчуудын эв нэгдлийг хангах томоохон хөшүүрэг болно гэж бодно. Асар их хүн амтай хоёр томоохон соёлын дунд орших монголчуудын оюун санааны хувьд тусгаар тогтносон байх, монгол үндсээ хэмээсэн хэн бүхний сэтгэлд итгэл найдварын оч болон асах миний Монголын Богд хэмээн эрхэмлэн дээдэлж хүлээн авбаас зохилтой хэмээсэн болой.
0 сэтгэгдэл