БНСУ-ын Ерөнхийлөгч Ли Жэ Мён 6 дугаар сарын 7-ны өдөр Жижиг, дунд үйлдвэрлэл, Стартап хариуцсан сайдаар ажиллаж буй эмэгтэй улстөрч Хань Сон Сүк /Han Seong-sook/-ийг Бүгд Найрамдах Солонгос Улсын Ерөнхий сайдад нэр дэвшүүллээ.

Энэ нь Ерөнхийлөгч Ли Жэ Мён-ы Засгийн газрын эдийн засаг, аж үйлдвэрийн бодлогын чиглэлд томоохон өөрчлөлт хийх дохио хэмээн улс төр, бизнесийн хүрээнд үнэлэгдэж байна. 

Энэхүү томилгоо нь олон арван жилийн турш Солонгосын эдийн засгийг ноёрхож ирсэн уламжлалт Чэболь/Chaebol (재벌) буюу гэр бүлийн хяналттай томоохон конгломерат корпорациудын төвлөрсөн бүтцээс аажмаар татгалзаж, “Хиймэл оюун ухаан (AI) + Жижиг, дунд үйлдвэрлэл (SME)” гэсэн хоёр тулгуурт шинэ эдийн засгийн загвар руу шилжих стратегийн эхлэл гэж үзэж байна.

Chaebol систем нь Samsung, Hyundai, SK, LG зэрэг дэлхийн хэмжээний корпорациудыг төрүүлж, Солонгосын эдийн засгийн гайхамшгийг бүтээсэн ч нөгөө талдаа зах зээлийн төвлөрөл, жижиг дунд бизнесийн өсөлтийг хязгаарлах, инновацын тэгш бус орчин бүрдүүлэх зэрэг олон шүүмжлэл дагуулсаар ирсэн.

Харин шинэ Ерөнхий сайдад нэр нэвшигч Хань Сон Сүк нь улс төрөөс бус, бизнес болон технологийн салбараас тодорсон прагматик удирдагч гэдгээрээ онцлогтой. Тэрбээр Солонгосын дижитал эдийн засаг, AI, платформ бизнесийн хөгжилтэй нягт холбоотой туршлагатай бөгөөд шинэ засгийн газар эдийн засгийн бүтцийг илүү уян хатан, инновацид суурилсан хэлбэрт шилжүүлэх зорилго агуулж байгааг илэрхийлж байна.

Шинэ бодлогын хүрээнд дараах чиглэлүүдэд анхаарах төлөвтэй байна. Үүнд:

• AI болон өндөр технологийн стартапуудыг төрийн бодлогоор дэмжих
• Жижиг, дунд үйлдвэрүүдийн санхүүжилт, экспорт, технологийн хүртээмжийг нэмэгдүүлэх
• Chaebol-уудын зах зээлийн давамгай байдлыг зохицуулах
• Үндэсний AI дэд бүтэц, дата төв, хүний нөөцийн бодлогыг эрчимжүүлэх
• Бүс нутгийн инновацын экосистемийг хөгжүүлэх

Гэсэн хэдий ч энэхүү өөрчлөлт нь бодит амьдрал дээр хэрэгжихэд маш олон сорилттой тулгарна гэж ажиглагчид үзэж байна.

• Нэгдүгээрт, Хань Сон Сүк нь бизнесийн өндөр туршлагатай боловч үндэсний хэмжээний улс төр, парламентын тохиролцоо, нам хоорондын тэмцлийн туршлага харьцангуй бага гэж үнэлэгдэж байна.
• Хоёрдугаарт, Chaebol-уудын улс төр, эдийн засгийн нөлөө Солонгост асар хүчтэй хэвээр байгаа бөгөөд реформын бодлого нь томоохон ашиг сонирхлын зөрчил, далд эсэргүүцэлтэй тулгарах магадлал өндөр байна.
• Гуравдугаарт, Солонгосын AI салбарын хөгжлийн бүтэц өөрөө төвөгтэй хэвээр байна. АНУ, Хятадтай өрсөлдөх хэмжээний AI экосистем бүрдүүлэхийн тулд асар их хөрөнгө оруулалт, дата бодлого, хагас дамжуулагчийн нийлүүлэлтийн сүлжээ, хүний нөөцийн шинэчлэл шаардлагатай байгаа юм.

Тиймээс Хань Сон Сүк-ийн нэр дэвшил нь зөвхөн шинэ Ерөнхий сайдын томилгоо бус, харин БНСУ дараагийн 10–20 жилийн эдийн засгийн хөгжлийн загвараа хэрхэн өөрчлөх вэ гэсэн стратегийн томоохон сорилтын эхлэл болж байна.

Цаашид Ли Жэ Мён-ы Засгийн газар “AI төвтэй инновацын эдийн засаг” болон “жижиг, дунд бизнесийн өрсөлдөх чадвар”-ыг бодитоор бий болгож чадах эсэх нь Солонгосын дараагийн хөгжлийн чиглэлийг тодорхойлох хамгийн чухал асуудлын нэг болох төлөвтэй байна.