Эрчим хүчний зохицуулах хорооноос дулаан, цахилгааны үнийг 5 хувиар нэмжээ.

Үнэ нэмсэн шалтгаанаа эрчим хүчний салбарын алдагдлыг бууруулах, үнийг бодит өртөгт ойртуулах зорилготой хэмээн тайлбарлажээ. Нэмэгдлийг энэ сарын 5-наас хэрэгжүүлж эхэлсэн аж.

Эрчим хүчний зохицуулах хорооныхон “Дулааны эрчим хүчний борлуулалтын үнэ болон бодит өртгийн хооронд 80 хувийн зөрүү үүсдэг аж. Тухайлбал, дулааны тариф нэг Гкал тутамд 33862 төгрөг байгаа бол бодит өртөг нь 62960 төгрөг юм байна. Уг зөрүүг улсын төсвөөс болон салбарын байгууллагууд өөрсдөө алдагдал хүлээх байдлаар нөхөж иржээ. Манайд өртгийг даруй 80 хувиар нэмэх шаардлага бий. Цаашид иргэдийн амьдралд дарамт нэмэхгүйгээр үе шаттай нэмэгдүүлнэ” гэжээ.

Засгийн газраас 2024 оны 11 дүгээр сарын 15-наас цахилгааны эрчим хүчний үнийг хэрэглээнээс нь хамааран нэмэгдүүлсэн. Харин дулааны үнэ тарифыг нэмэх шийдвэр 2024, 2025 онд гарч байсан ч хэрэгжилгүй хойшилсоор энэ удаа таван хувиар нэмлээ.