Байгаль орчин, уур амОУАӨ-ийн дэд сайд Б.Мөнхтамир НҮБ-ын Цөлжилттэй тэмцэх тухай Конвенцын Талуудын 17 дугаар бага хурлын хүрээнд Riyadh Action Agenda Community Platform буюу “Риядын үйл ажиллагааны хөтөлбөрийн олон нийтийн платформ”-ыг танилцуулах арга хэмжээнд оролцлоо. 

Энэхүү платформ нь 2024 онд Саудын Арабд болсон СОР16 бага хурлын үеэр эхлүүлсэн Риядын үйл ажиллагааны хөтөлбөр (Riyadh Action Agenda)-ийн үргэлжлэл бөгөөд газрын доройтлыг бууруулах, нөхөн сэргээлтийг эрчимжүүлэх чиглэлээр дэлхий дахинд хэрэгжиж буй бодит үйл ажиллагааг нэгтгэн харуулах зорилготой юм. 

Уг хөтөлбөр нь 2030 он гэхэд 1.5 тэрбум га доройтсон газрыг нөхөн сэргээхийн тулд улс орнуудын сайн дурын санаачилга болон үйл ажиллагааг уялдуулахад чиглэж байгаа бөгөөд түншүүд болон тэдний санаачилгыг нэг дор харуулахаас гадна газрын болон хөрсний нөхөн сэргээлтэд оруулж буй хувь нэмрийг үнэлэх, хамтын ажиллагааг өргөжүүлэх дижитал орчин болох юм.

Арга хэмжээний үеэр БОУАӨ-ийн дэд сайд Б.Мөнхтамир энэхүү олон нийтийн платформыг дэмжиж, Монгол Улсын Засгийн газраас санаачилж буй “Тал хээрийн төлөвлөгөө”-г Риядын үйл ажиллагааны хөтөлбөртэй уялдуулна гэдгээ илэрхийллээ. 

Мөн тэрбээр хэлсэн үгэндээ “Монгол Улс COP17 бага хурлыг хүлээн авч буй энэ үед зохион байгуулагч улс орнуудын хоорондын залгамж холбоо, өмнө бий болсон түншлэл, хамтын ажиллагааны эрчийг хадгалахыг чухалчилж байна. Энэ хүрээнд Риядын Үйл ажиллагааны хөтөлбөр болон Монгол Улсын “Тал хээрийн төлөвлөгөө” нь харилцан бие биеэ нөхөх, НҮБ-ын Цөлжилттэй тэмцэх конвенцийн хүрээнд бодит үйл ажиллагааг улам эрчимжүүлэх боломжтой санаачилгууд юм.

Монгол Улсын Тал хээрийн төлөвлөгөөний гурван үндсэн санаачилга болох Бэлчээрийн тэргүүлэх санаачилга, Ус ба газрын нэгдсэн менежмент, Байгальд суурилсан тогтвортой хөгжлийн санаачилга нь Риядын Үйл ажиллагааны хөтөлбөрийн Олон нийтийн платформтой холбогдож буй үндсэн санаачилгуудын нэг хэсэг болж байна.

Үүнээс гадна Монгол Улсын “Тэрбум мод” үндэсний хөдөлгөөн, “333 нуур” санаачилга, иргэний нийгмийн байгууллагууд, хувийн хэвшил, судалгааны байгууллагуудын хэрэгжүүлж буй олон төсөл хөтөлбөр тус платформд нэгдэж байна.

Монгол Улс цаашид COP16-ын санаачилга, НҮБ-ын Цөлжилттэй тэмцэх конвенцын Нарийн бичгийн дарга нарын газар, Ambition Loop болон Риядын Үйл ажиллагааны хөтөлбөрийн нийт гишүүдтэй нягт хамтран ажиллаж, газар, ус, уур амьсгалын өөрчлөлт, биологийн олон янз байдлыг уялдаа холбоотойгоор авч үзсэн цогц арга барилыг дэмжин ажиллана” гэдгийг онцоллоо.