НҮБ-ын Цөлжилттэй тэмцэх конвенцын Талуудын 17 дугаар бага хурал (UNCCD COP17)-ын хүрээнд “Meaningful Youth Participation in Environmental Decision-Making” буюу “Байгаль орчны шийдвэр гаргалтад залуучуудын бодит оролцоо” сэдэвт панел хэлэлцүүлэг боллоо.

Үндэсний байгаль орчны залуучуудын зөвлөлөөс зохион байгуулсан тус хэлэлцүүлгээр залуучуудын оролцоог зөвхөн уулзалт, хэлэлцүүлэгт оролцох түвшинд бус, бодлого, шийдвэрт бодитоор нөлөөлөх тогтолцоонд шилжүүлэхэд шаардлагатай боломж, механизм болон тулгамдаж буй асуудлуудыг хэлэлцэв.

Хэлэлцүүлэгт Байгаль орчин, уур амьсгалын өөрчлөлтийн яамны Бодлого, төлөвлөлтийн газрын дарга, доктор М.Намхайринчэн оролцож, төрийн бодлого, шийдвэр гаргах үйл явцад залуучуудын саналыг бодитоор тусгах боломж, одоо байгаа механизм болон цаашид анхаарах асуудлын талаар байр сууриа илэрхийллээ.

Тэрбээр залуучуудын санал, санаачилга нь онол, олон улсын туршлагад суурилахын зэрэгцээ Монгол орны онцлог нөхцөл байдалд нийцсэн байх, мөн шийдвэр гаргах эрх бүхий байгууллагад албан ёсны сувгаар хүрэх нь бодлогод бодитоор тусах боломжийг нэмэгдүүлдэг болохыг онцлов. 

Залуучуудын дэвшүүлсэн олон сайн санал, санаачилга форум, уулзалт, хэлэлцүүлэг болон залуучуудын сүлжээний хүрээнд үлдэж, холбогдох шийдвэр гаргах байгууллагад хүрэхгүй байх нь бодит нөлөө үзүүлэх боломжийг хязгаарладаг талаар мөн дурдлаа.

Үүний зэрэгцээ яамнаас боловсруулж буй хууль, журам, бодлогын баримт бичгийн төсөлд залуучууд болон залуучуудын байгууллагууд албан ёсны цахим сувгаар саналаа хүргүүлэх, олон нийтийн хэлэлцүүлэгт биечлэн оролцох зэрэг хэлбэрээр санал, зөвлөмжөө бодлого боловсруулах үйл явцад хүргүүлэх боломжтойг онцоллоо.

Залуусын оролцоог зөвхөн үе үе зохион байгуулагддаг уулзалт, хэлэлцүүлгээр хязгаарлах бус, байгаль орчны бодлого, шийдвэр боловсруулах үйл явцад тогтмол, ил тод, хүртээмжтэй байдлаар оролцох институтчилсэн механизмыг бэхжүүлэх нь чухал гэдгийг дурдав.

Хэлэлцүүлгийн үеэр залуучуудын оролцоо нь зөвхөн тэдний идэвх санаачилгаас гадна төрийн байгууллагууд залуучуудын дуу хоолойг сонсох, саналыг нь бодлого боловсруулах, хэрэгжүүлэх, хяналт-шинжилгээ, үнэлгээний үе шатанд тусгах бодит боломж, механизмыг бүрдүүлэх шаардлагатайг гэдэгт санал нэгдсэн юм.