УИХ-ын чуулганы маргаашийн хуралдаанаар Ерөнхийлөгчийн санаачилсан УИХ-ын тухай хуульд нэмэлт өөрчлөлт оруулах тухай хуулийн төслийг хэлэлцэх эсэхийг шийдэх билээ.

УИХ дахь ИЗНН Ерөнхийлөгчийн өргөн барьсан УИХ-ын гишүүнийг эгүүлэн татахтай холбоотой хуулийг төслийг дэмжихгүй хэмээн өнөөдөр мэдээлэл хийлээ.

Энэ асуудлаар УИХ-ын гишүүн, ИЗНН-ын дарга Б.Батбаатар, ИЗНН Ерөнхийлөгчийн УИХ-ын гишүүнийг эгүүлэн татах тухай хуулий төслийг хэлэлцэхийг дэмжих эсэхэд дэмжихгүй санал өгөх улс төрийн шийдвэр гаргалаа. УИХ-ын чуулган дээр Ерөнхийлөгчийн санаачилсан УИХ-ын гишүүнийг эгүүлэн татах хуулийг хэлэлцэхийг дэмжихгүй. Парламентын асуудалд Үндсэн хуулийн цэц оролцдог байж болохгүй ээ. Эрх баригч нам нь бусад намынхаа дотоод асуудалд оролцдог байдал ч буруу. Үүнээс болж АН хуваагдаж байсныг бүгд мэдэж байгаа гэв.

Мөн УИХ-ын гишүүн М.Нарантуяа-Нара "Манай намынхан Ерөнхийлөгчийн өргөн барьсан хуулийг эсэргүүцэж байна. Жагсаалтын гишүүдийг намынх нь саналаар эгүүлэн татдаг болбол парламентын гишүүн намын удирдлагаас хараат болно. Монголд хүнд ганц л эрх бий. Тэр нь сонгууль өгөх. Энэ эрхийг нь, ардчиллыг нь хааж болохгүй ээ" хэмээлээ.

Ерөнхийлөгчийн өргөн барьсан хуулийн төслийг хэлэлцэх эсэхийг маргааш болох УИХ-ын чуулганы нэгдсэн хуралдаанаар шийдэх юм.