Утга зохиолын Нобелийн шагналын 2026 оны эзнээр Канадын яруу найрагч, эсээч, эртний Грекийн уран зохиолын орчуулагч, судлаач Энн Карсон тодорлоо.

Нобелийн утга зохиолын хорооноос “Сонгодог утга зохиолын хэлний уламжлалыг егөөтэй харилцан яриагаар сүлж, орчин үеийн уран зохиолд шинэ хэлбэрийг бий болгосных нь төлөө” мөнхүү шагналыг оноожээ. 

Энн Карсон 1950 онд Канадын Торонто хотод төрсөн. Ахлах сургуульд байхад нь латин хэлний багш нь түүнийг эртний Грекийн уран зохиолтой анх танилцуулжээ. Тэрбээр Торонтогийн их сургуульд бакалавр, магистр, докторын зэрэг хамгаалж, Шотландын Сент-Эндрюсийн их сургуульд эртний Грекийн шүлэглэл зүй, эх бичвэр судлалаар суралцжээ.  

Карсоны бүтээлүүдэд эртний сонгодог зохиолыг постмодерн хэв маягтай сүлжин, яруу найраг хийгээд хүүрнэлийн заагийг арилгасан туульслаг бүтээлүүд зонхилдог байна.  Зохиолчид алдар авчирсан бүтээл нь 1998 онд хэвлэгдсэн “Улааны намтар” хэмээх шүлэглэсэн роман. Мөнхүү зохиолд Грекийн домгийн мангас Герионыг орчин цагийн эмзэг, уян зөөлөн хүү болгон дүрсэлж, өсвөр насны хайр сэтгэл, өөрийгөө танин мэдэхүйн тухай өгүүлсэн аж. Тэрчлэн 2001 онд гарсан “The Beauty of the Husband: A Fictional Essay in 29 Tangos”  бүтээлээрээ Т.С. Элиотын нэрэмжит шагналыг хүртсэн анхны эмэгтэй яруу найрагч болжээ.

2016 онд гаргасан “Хөвөн хөвөхүй” түүвэр нь 22 жижиг товхимолоос бүрдэх бөгөөд уншигч хүссэн дарааллаараа уншиж болохуйц шийдэлтэй.  Харин хамгийн сүүлд буюу 2024 онд хэвлүүлсэн “Wrong Norma” нь Жозеф Конрадын тухай өгүүлэхээс эхлээд цас, Гуантанамо, ядуурал зэрэг хоорондоо огт холбоогүй сэдвүүдийг хөндсөн хүүрнэл шүлгүүдээс бүрдсэн ажээ.